कालीगण्डकी जलविद्युत् आयोजनाको स्थलगत भ्रमणपछि चन्द्र ढकाल भन्छन्- साँच्चै हृदयविदारक !

काठमाडौं । आइएमई ग्रुपका अध्यक्ष चन्द्रप्रसाद ढकालले कालीगण्डकी नदीमा आएको भीषण बाढीले म्याग्दी र आसपासका क्षेत्रमा पुर्‍याएको क्षतिप्रति दुःख व्यक्त गरेका छन्। उनले विपत्तिबीच पनि पुनर्निर्माण र सडक पुनः सञ्चालनका काम तीव्र गतिमा अघि बढेकाले आशा जागेको बताएका छन्। म्याग्दीको अन्नपूर्ण गाउँपालिकामा आइएमई ग्रुपको लगानीमा निर्माणाधीन मध्य कालीगण्डकी जलविद्युत् आयोजनाको स्थलगत भ्रमणपछि सामाजिक सञ्जालमार्फत धारणा सार्वजनिक गर्दै ढकालले बाढीले सडक, पुल, स्थानीय बस्ती र जनजीवनमा पारेको असर हृदयविदारक रहेको उल्लेख गरेका छन्। उनले अवरुद्ध बनेको बेनी–जोमसोम सडकखण्ड पुनः सञ्चालनमा आउनुलाई सकारात्मक उपलब्धि भन्दै यसबाट स्थानीय बासिन्दा, यात्रु, पर्यटक तथा मुक्तिनाथ दर्शनमा जाने दर्शनार्थीलाई राहत पुगेको बताएका छन्। साथै, जोमसोम, लोमान्थाङ र कोरला नाकासम्मको आवागमन सहज बनाउन सडक पुनः सञ्चालनले महत्त्वपूर्ण भूमिका खेलेको उनको भनाइ छ। विपद् व्यवस्थापन, राहत तथा सडक पुनर्स्थापनामा सक्रिय भूमिका निर्वाह गर्ने नेपाल सरकार, गण्डकी प्रदेश सरकार, स्थानीय तह, सडक विभाग, प्राविधिक कर्मचारी र सुरक्षा निकायप्रति उनले आभार व्यक्त गरेका छन्। बाढीपहिरोमा ज्यान गुमाउनेहरूप्रति श्रद्धाञ्जली अर्पण गर्दै प्रभावित परिवारप्रति समवेदना व्यक्त गरेका ढकालले सामूहिक संकल्प, समन्वय र सहकार्यबाट विपत्तिपछिको पुनर्निर्माण सम्भव हुने विश्वास व्यक्त गरेका छन्।