रसुवाका बाढीपीडितलाई ठमेलका रात्रीकालिन मनोरञ्जन व्यवसायीको सहयोग

काठमाडौं । नेपाल रात्रीकालिन मनोरञ्जन व्यवसायी सङ्घ ठमेलले रसुवाको भोटेकोशी बाढीबाट प्रभावित नागरिकलाई खाद्यान्न र नगद सहयोग गरेको छ । सङ्घले गत भदौ १० गते रसुवाको भोटेकोशी बाढीबाट प्रभावित भई काठमाडौँको स्वयम्भुस्थित मुस्ताङ गुम्बामा बसोबास गर्दै आएका नागरिकलाई रु पाँच लाख ५१ रुपैँया नगद र खाद्यान्न सहयोग गरेको हो । उक्त रकम र खाद्यान्न सोमबार साँझ सङ्घका अध्यक्ष रुपेश गुरुङले रसुवाको गोसाईकुण्ड गाउँपालिका–२ की कार्यवाहक वडाअध्यक्ष किप्पा नगरकोटीलाई हस्तान्तरण गर्नुभयो । उक्त गुम्बामा हाल रसुवाका १५५ परिवारका ३०० भन्दा बढी नागरिकले आश्रय लिइरहेका छन् । बाढीका कारण घरबार, खाद्यान्न तथा दैनिक उपभोग्य सामग्रीमा क्षति व्यहोर्नुपरेका प्रभावित परिवारलाई लक्षित गर्दै सहयोग उपलब्ध गराइएको सङ्घका अध्यक्ष गुरुङले जानकारी दिनुभयो । विपद्का कारण समस्यामा परेका नागरिकलाई तत्काल राहत प्रदान गरी उनीहरूको दैनिक जीवन सहज बनाउन सहयोग गरिएको सङ्घले जनाइएको छ । बाढीप्रभावित रसुवा र नुवाकोटका बासिन्दालाई पाँच लाख नगदका साथै १२ बोरा चामल, तीन बोरा दाल, एक बोरा च्युरा, ३० कार्टुन चाउचाउ र महिलाका लागि स्यानिटरी प्याड उपलब्ध गराइएको संयोजक प्रकाश श्रेष्ठ ‘टाइगर’ले जानकारी दिनुभयो । प्राकृतिक विपद्का बेला प्रभावित नागरिकलाई सहयोग गर्नु सामाजिक उत्तरदायित्व भएको उल्लेख गर्दै सहयोगले पीडित परिवारलाई केही राहत मिल्ने विश्वास व्यक्त गरिएको छ । सहयोग हस्तान्तरण कार्यक्रममा सङ्घका सल्लाहकारद्धय कर्मा घले र श्री शाही, सङ्घका सचिव सबु तामाङ, कोषाध्यक्ष रमेशकुमार श्रेष्ठको सहभागीता रहेको थियो । बाढी प्रभावित क्षेत्रमा राहत तथा पुन:स्थापनाका लागि सरकारी निकाय, विभिन्न संघसंस्था, निजी क्षेत्र र स्थानीय समुदायबीच सहकार्य आवश्यक रहेको बताइएको छ । The post रसुवाका बाढीपीडितलाई ठमेलका रात्रीकालिन मनोरञ्जन व्यवसायीको सहयोग appeared first on Corporate Khabar : Nepals First Corporate News Magazine and Portal.