सुदूरपश्चिम रोयल्सको स्टे पार्टनरमा रोयल ट्युलिप काठमाडौं

काठमाडौं । नेपाल प्रिमियर लिग (एनपिएल) को फ्रेन्चाइज टोली सुदूरपश्चिम रोयल्सले रोयल ट्युलिप काठमाडौंलाई आफ्नो स्टे पार्टनरका रूपमा आबद्ध गरेको छ । रोयल ट्युलिप काठमाडौंका महाप्रबन्धक बलराम पाठकले सुदूरपश्चिम रोयल्ससँग साझेदारी गर्न पाउँदा खुसी लागेको बताउनुभयो । उहाँले नेपालमा क्रिकेटले मानिसहरूलाई जोड्ने महत्त्वपूर्ण माध्यमको रूप लिइरहेको र एनपिएलले नेपाली क्रिकेटमा नयाँ अध्याय थपिरहेको उल्लेख गर्नुभयो । ‘सुदूरपश्चिम रोयल्ससँग साझेदारी गर्न र नेपाल प्रिमियर लिगको हिस्सा बन्न पाउँदा हामी खुसी छौं । क्रिकेटले मानिसहरूलाई जोड्ने प्रभावकारी माध्यमको रूप लिएको छ भने एनपिएलले नेपालमा यस खेलको विकासमा नयाँ अध्याय थपिरहेको छ । खेलकुद र पर्यटनबीच स्वाभाविक सम्बन्ध छ । ठूला खेलकुद प्रतियोगिताले खेलाडी, समर्थक, व्यवसायी र आगन्तुकलाई एकै ठाउँमा ल्याएर नेपाललाई नयाँ तरिकाले अनुभव गर्ने अवसर सिर्जना गर्छन्’, पाठकले भन्नुभयो । उहाँले नेपाली क्रिकेटको प्रवर्द्धन, खेल पर्यटनलाई प्रोत्साहन र नेपाललाई स्वागतयोग्य गन्तव्यका रूपमा स्थापित गर्ने प्रयासमा सहयोग गर्न पाउँदा गर्व लागेको बताउनुभयो । उहाँले एनपिएल यात्राभरि सुदूरपश्चिम रोयल्ससँगको सहकार्य सफल र अर्थपूर्ण हुने विश्वास पनि व्यक्त गर्नुभयो । सुदूरपश्चिम रोयल्सका प्रमुख कार्यकारी अधिकृत प्रकाश खड्काले रोयल ट्युलिप काठमाडौंसँगको साझेदारीले टोलीको आतिथ्य व्यवस्थापनलाई थप व्यवस्थित बनाउनुका साथै खेलकुद र पर्यटनबीचको सम्बन्धलाई बलियो बनाउन सहयोग पुग्ने बताउनुभयो । ‘रोयल ट्युलिप काठमाडौंजस्तो प्रतिष्ठित आतिथ्य संस्थासँग साझेदारी गर्न पाउँदा हामी खुसी छौं । एनपिएल क्रिकेट प्रतियोगितामात्र नभई नेपालको पर्यटन र आतिथ्य क्षेत्रलाई प्रवर्द्धन गर्ने महत्त्वपूर्ण अवसर पनि हो । यस साझेदारीमार्फत् खेलाडी, समर्थक र प्रतियोगितासँग जोडिएका आगन्तुकलाई गुणस्तरीय आतिथ्य अनुभव प्रदान गर्ने अपेक्षा गरेका छौं । नेपाली क्रिकेटको विकास र खेल पर्यटन प्रवर्द्धनमा निजी क्षेत्रसँगको सहकार्य महत्त्वपूर्ण छ । रोयल ट्युलिप काठमाडौंसँगको सहकार्य अर्थपूर्ण र सफल हुने विश्वास लिएका छौं’, खड्काले भन्नुभयो ।