पोखरा एभेन्जर्सको आइकोनिक खेलाडीमा विश्वास पराजुली

काठमाडौं । नेपाल प्रिमियर लिग (एनपिएल) को फ्रेन्चाइज टोली पोखरा एभेन्जर्सले विश्वास पराजुलीलाई आइकोनिक खेलाडीका रूपमा छनोट गरेको छ । पोखरा रंगशालास्थित क्रिकेट मैदान र स्याङ्जामा आयोजित ट्यालेन्ट हन्टबाट विश्वास पोखरा एभेन्जर्सको आइकोनिक खेलाडी बन्नुभएको हो । यसअघि गण्डकी हिरोज टपमा रहिसकेका विश्वासले आगामी एनपिएलमा पोखरा एभेन्जर्सको प्रतिनिधित्व गर्नुहुनेछ । टोलीका मुख्य प्रशिक्षक अजन्था मेन्डिससहितको कोचिङ टिमले विभिन्न चरणको छनोट प्रक्रिया पूरा गरी उहाँलाई आइकोनिक खेलाडीका रूपमा छनोट गरेको हो । ट्यालेन्ट हन्टबाट तनहुँका सुप्रिम सुनार, नवलपुरका रिजन काफ्ले, कास्कीका सौरभ सिद्दिकी र स्याङ्जाका शिशिर लुइटेल पनि गण्डकी हिरोज २०२६ का लागि छनोट हुनुभएको छ । उहाँहरू पोखरा एभेन्जर्सको डेभलपमेन्ट स्क्वाडमा समावेश हुनुहुनेछ । पोखरा एभेन्जर्सका महाप्रबन्धक अमित लोहनीले ग्रासरुट तहदेखि नै क्रिकेट प्रतिभाको पहिचान गरी उनीहरूको विकास र प्रवर्द्धन गर्ने उद्देश्यले ट्यालेन्ट हन्ट आयोजना गरिएको बताउनुभयो । यसले स्थानीय खेलाडीलाई आफ्नो क्षमता प्रदर्शन गर्ने अवसर प्रदान गर्नुका साथै व्यावसायिक क्रिकेटमा अघि बढ्न सहयोग पुग्ने अपेक्षा गरिएको छ । एनपिएलको तयारीमा रहेको पोखरा एभेन्जर्सले पोखरा रंगशालास्थित क्रिकेट मैदानमा प्रशिक्षण गरिरहेको छ । टोलीले मार्की खेलाडी कुशल भुर्तेलसहित अर्जुन कुमाल, सागर ढकाल, विपिन खत्री, आकाश चन्द, किरण ठगुन्ना र दिनेश खरेललाई रिटेन गरेको छ । त्यस्तै, अक्सनबाट अर्जुन घर्ती मगर, विवेक राना मगर, सुदीप अर्याल, सन्नी बिके, विपिन आचार्य र प्रतीक पोखरेललाई टोलीमा अनुबन्ध गरेको छ । विदेशी खेलाडीका रूपमा बंगलादेशका अलराउन्डर शकिब अल हसन र श्रीलंकाका अलराउन्डर धनञ्जय लक्षणलाई अनुबन्ध गरेको पोखराले टोलीलाई बलियो बनाउने तयारी गरेको छ । पोखरा एभेन्जर्सले श्रीलंकाका पूर्वअन्तर्राष्ट्रिय खेलाडी बलापुवाडुगे अजन्था विन्स्लो मेन्डिसलाई मुख्य प्रशिक्षकको जिम्मेवारी दिएको छ । मेन्डिस पोखरा पुगेर खेलाडीलाई प्रशिक्षण दिइरहनुभएको छ । स्थानीय प्रतिभाको पहिचान, अनुभवी खेलाडीको संयोजन र विदेशी खेलाडीको उपस्थितिसहित पोखरा एभेन्जर्स एनपिएलको तयारीमा जुटेको छ ।