तिब्बती भाषा पढाउन भारत लगिँदै गरिएका २५ बालबालिकाकाे उद्धार

कञ्चनपुर । तिब्बती भाषा अध्ययनका लागि भारतको देहरादुन लैजान लागिएका १० वर्षमुनिका २५ बालबालिकालाई भारतीय सीमा सुरक्षा निकायले नेपाल फर्काएको छ। कञ्चनपुरको गड्डाचौकी नाका हुँदै भारत प्रवेश गरेका उनीहरूलाई बनबासास्थित चेकपोस्टमा रोकेर नेपाल फर्काइएको हो। हुम्लाको सिमकोट गाउँपालिका–८, सेयराका ती बालबालिकालाई पञ्चपविर बुढाले भारततर्फ लगेको बताइएको छ। बनबासास्थित चेकपोस्टमा पुगेपछि भारतीय पक्षले उनीहरूलाई रोकेको थियो। भारतबाट फर्काइएका सबै बालबालिकालाई कञ्चनपुर प्रहरीको जिम्मा लगाइएको छ। प्रहरीले बालबालिकालाई भारत लैजानुको उद्देश्यबारे अनुसन्धान अघि बढाएको जनाएको छ। बालबालिकालाई तिब्बती भाषा अध्ययनका लागि देहरादुन लैजान लागिएको भनिए पनि त्यहाँको कुन शैक्षिक संस्थामा भर्ना गराउने तयारी गरिएको थियो भन्ने खुल्न सकेको छैन। त्यस्तै, उनीहरूलाई भारत लैजानुअघि अभिभावकको सहमति लिइएको थियो वा थिएन भन्ने विषयसमेत स्पष्ट हुन बाँकी छ। घटनाबारे थप विवरण आउन बाँकी रहेको कञ्चनपुर प्रहरीले जनाएको छ। बालबालिकालाई भारत लैजानुको वास्तविक उद्देश्य र यसमा संलग्न व्यक्तिहरूबारे प्रहरीले अनुसन्धान गरिरहेको छ।