बुढीगण्डकी बाढी : ३१४ जनाको उद्धार, ५ जना सम्पर्कविहीन

गोरखा । सिरिङ्गे हिमालमा गएको हिमपहिरोका कारण उइन्गुलुङ खोला थुनिएर बुढीगण्डकी नदीमा आएको बाढीपछि प्रभावित क्षेत्रमा खोजी, उद्धार, राहत तथा पुनर्निर्माणका काम तीव्र पारिएको छ। बाढी प्रभावित क्षेत्रबाट १९ विदेशी नागरिकसहित ३१४ जनाको उद्धार गरिएको छ भने पाँच जना स्थानीय अझै सम्पर्कविहीन छन्। सम्पर्कविहीन व्यक्तिहरूको खोजीका लागि सुरक्षाकर्मी परिचालन गरिएको छ। विपद् जोखिम न्यूनीकरण तथा व्यवस्थापन प्राधिकरणको समन्वयमा बाढी प्रभावित क्षेत्रमा अहिलेसम्म ७०३ जना सुरक्षाकर्मी खटाइएको छ। बाढीका क्रममा आरुघाट जलमापन केन्द्रमा बुढीगण्डकी नदीको सतह खतराको तह पाँच मिटर नाघेर ८.४३ मिटरसम्म पुगेको थियो। सम्भावित जोखिमबाट नागरिकलाई सुरक्षित राख्न करिब दुई लाख जनालाई पूर्वसूचना पठाइएको थियो। बाढीको अवस्था अनुगमन तथा उद्धार कार्यलाई प्रभावकारी बनाउन प्राधिकरणको कमान्ड पोस्टले तत्काल बैठक बसेर आवश्यक परिचालन सुरु गरेको थियो। बाढीले गोरखा र धादिङका दुई सयभन्दा बढी घरमा क्षति पुर्‍याएको छ। त्यसैगरी, करिब डेढ सय चौँरीगाई तथा भेडाबाख्रा बगाएको प्रारम्भिक विवरण छ। बाढीका कारण खानेपानी आयोजना, निर्माणाधीन जलविद्युत् आयोजना, विद्यालयलगायतका संरचनामा समेत क्षति पुगेको छ। मनास्लु पदमार्ग तथा गोरखा–धादिङ जोड्ने मुख्य सडकका तीनवटा पक्की पुल र दुईवटा झोलुङ्गे पुलमा पनि क्षति पुगेको छ। यसले प्रभावित क्षेत्रको यातायात तथा आवागमनमा थप समस्या सिर्जना गरेको छ। यसैबीच, सरकारले विपद्पछिको राहत वितरण र पुनर्निर्माणलाई तीव्रता दिएको छ। सोमबार काठमाडौंबाट हवाई साधनमार्फत गोरखाको फिलिममा चार हजार २७० किलोग्राम खाद्यान्न र एक हजार ९०० लिटर हवाई इन्धन ढुवानी गरिएको छ। उक्त सामग्रीमार्फत प्रभावित क्षेत्रमा आपत्कालीन राहत वितरण अघि बढाइएको छ। अवरुद्ध सडक तथा पुल पुनः सञ्चालनमा ल्याउनसमेत काम भइरहेको छ। आरुघाट–सल्यानटार जोड्ने पुल सञ्चालनमा ल्याउन हेटौँडाबाट बेलिब्रिजका सामग्री ल्याएर निर्माण कार्य तीव्र पारिएको छ। त्यस्तै, छेपारे भीरमा एक्स्काभेटर परिचालन गरी दोभान–सल्लेरी सडक खुलाउने प्रयास भइरहेको छ। सरकारले दसैँअघि नै बाढीका कारण अवरुद्ध भएका सबै सडक सञ्चालनमा ल्याउने लक्ष्य लिएको छ। खोजी तथा उद्धार कार्यसँगै प्रभावित परिवारलाई राहत उपलब्ध गराउने र क्षतिग्रस्त संरचनाको पुनर्निर्माण गर्ने कामलाई निरन्तरता दिइएको छ।