नेपालका लागि इन्डोनेसियाकी राजदूत लिस्टियोवतीलाई आईएमई ग्रुपद्वारा स्वागत, द्विपक्षीय आर्थिक सहकार्य, व्यापार र लगानी विस्तारमा जोड

काठमाडौं । नेपालका लागि इन्डोनेसियाकी राजदूत लिस्टियोवतीलाई आईएमई ग्रुपले सोमबार स्वागत गरेको छ । आईएमई ग्रुपका अध्यक्ष तथा नेपालका लागि इन्डोनेसियाका अवैतनिक महावाणिज्यदूत चन्द्रप्रसाद ढकालले ग्रुपको कार्यालयमा राजदूत लिस्टियोवतीलाई स्वागत गरेका हुन् । सामाजिक सञ्जालमार्फत जानकारी दिँदै ढकालले नेपाल र इन्डोनेसियाबीच लामो समयदेखि मैत्रीपूर्ण सम्बन्ध रहँदै आएको उल्लेख गरेका छन् । ढकालले पारस्परिक सहयोग, साझा मूल्य–मान्यता र आपसी हितमा आधारित दुई देशबीचको सम्बन्धलाई थप बलियो बनाउन राजदूत लिस्टियोवतीको प्रतिबद्धता प्रेरणादायी रहेको पनि बताएका छन् । उनले राजदूत लिस्टियोवतीको कार्यकाल सफल, फलदायी र उपलब्धिमूलक रहोस् भन्ने शुभकामना पनि व्यक्त गरेका छन् । स्वागतका क्रममा राजदूत लिस्टियोवतीले नेपाल–इन्डोनेसिया सम्बन्धलाई उचाइ दिन तथा द्विपक्षीय सम्बन्ध सुदृढ पार्ने आफ्नो योजना रहेको जानकारी गराएकी छिन् । राजदूत लिस्टियोवती बंगलादेशको ढाकामा रहेर नेपालका लागि इन्डोनेसियाको राजदूतको जिम्मेवारी सम्हाल्दै आएकी छिन् । उनको नियुक्तिसँगै नेपाल र इन्डोनेसियाबीचको द्विपक्षीय सम्बन्ध, व्यापार, लगानी तथा आर्थिक सहकार्य विस्तारका सम्भावनाबारे चासो बढेको छ । दुई देशबीच कूटनीतिक सम्बन्धसँगै आर्थिक तथा व्यावसायिक सहकार्यको व्यापक सम्भावना रहेको उल्लेख गर्दै निजी क्षेत्रबीचको सम्पर्क र लगानीसम्बन्धी संवादले आर्थिक सम्बन्धलाई अघि बढाउन सहयोग पुर्याउने विश्वास गरिएको छ ।