ओमानलाई जित्दा नेपालले एकदिवसीय अन्तर्राष्ट्रिय मान्यता जोगाउने सम्भावना

काठमाडौं । रोहित पौडेलको अर्धशतक र करण केसीको आक्रामक ब्याटिङमा नेपालले क्रिकेट विश्वकप लिग २ मा मंगलबार घरेलु टोली ओमानलाई १ सय १३ रनले पराजित गरेको छ । यससँगै नेपाल एकदिवसीय अन्तर्राष्ट्रिय मान्यता बचाउको नजिक पुगेको छ । रोहितले ६१ रन बनाए भने करणले इनिङ्सको अन्त्यतिर १६ बलमा ४० रनको इनिङ्स खेलेपछि टस जितेको नेपालले मस्कटस्थित अल एमेरत क्रिकेट मैदानमा निर्धारित ५० ओभरमा ८ विकेट गुमाई २ सय ६३ रन बनायो । नेपालले जबाफमा ओमानलाई ४० ओभरमै १ सय ५० रनमा अलआउट गरेको थियो । नेपालले ओमान भ्रमणमा लगातार दोस्रो खेल जितेको हो । नेपालले शुक्रबार पहिलो खेलमा क्यानडालाई ४१ रनले हराएको थियो । नेपालले जितपछि ३४ खेलबाट २८ अंक बनाएको छ । नेपालले छैटौं स्थानलाई मजबुत पारेको छ । आठ राष्ट्र सहभागी ३ वर्षे सर्कलको लिग २ मा क्यानडा ३४ खेलमा २५ अंकसहित सातौं र यूएई ३२ खेलमा १९ अंकसहित आठौं स्थानमा छ । अमेरिका ३५ खेलमा ४९ अंक जोडेर च्याम्पियन बनिसकेको छ । स्कटल्यान्ड ३६ खेलमा ४५, नेदरल्यान्ड्स ३२ खेलमा ३८, ओमान ३० खेलमा ३३ र नामिबिया ३५ खेलमा ३१ अंक बटुल्दै क्रमशः दोस्रोदेखि पाँचौं स्थानमा छ । शीर्ष चार टोलीले फेब्रुअरीमा हुने विश्वकप छनोटमा सोझै प्रतिस्पर्धा गर्नेछन् भने लिग २ को तल्लो चार टोलीले डिसेम्बरमा हुने विश्वकप छनोट प्लेअफमा प्रतिस्पर्धा गर्नेछन् । एकदिवसीय अन्तर्राष्ट्रिय मान्यताको हिसाबमा लिग २ को स्पष्ट खाका प्रस्ट छैन । तर शीर्ष ६ भित्र पर्ने टोलीको एकदिवसीय अन्तर्राष्ट्रिय मान्यता यथावत रहने बताइएको छ । लिग २ को अन्तिम शृंखला खेलिरहेको नेपालले अब शनिबार क्यानडा र सोमबार ओमानसँग खेल्ने छ । बाँकी दुईमध्ये एक खेल जितेमा नेपाल शीर्ष ६ भित्र पर्ने निश्चित हुनेछ । ओपनर आसिफ शेख लगातार दोस्रो खेलमा असफल रहे । उनी १५ बल खेल्दै ४ रनमा आउट भए । अर्जुन कुमाल र इशान पाण्डेले दोस्रो विकेटमा ६७ रनको साझेदारी गरे । इशानले ५५ बलमा ४ चौकासहित ३७ रन बनाए । ओपनर अर्जुनले ५९ बलको इनिङ्स खेल्दै ४ चौकासहित ४० रन जोडे । अघिल्लो खेलमा शतक बनाएका पूर्वकप्तान रोहितले अर्को उपयोगी इनिङ्स खेले । नेपाललाई अत्यावश्यक अवस्थामा उनले ३ चौका र १ छक्का प्रहार गरे । रोहितले बसिर अहमदसँग चौथो विकेटमा ७६ रन जोडेका थिए । बसिरले ५० बलमा ३७ रन बनाई कट गर्न खोज्दा विकेटकिपरलाई क्याच दिन पुगे । उनले ३ चौका प्रहार गरे । दीपेन्द्रसिंह ऐरी १७ बलमा २२ र सन्दीप जोरा १२ बलमा १० रन बनाई आउट भए । तर करणले अन्तिम २ ओभरमा गरेको विस्फोटक ब्याटिङले खेलको पुरै नक्सा बदल्यो । उनले ४९ औं ओभरमा ३ छक्का र एक चौका प्रहार गरे । नेपालले उक्त ओभरमा २५ रन जोड्दा करण एक्लैले २४ रन बनाए । अन्तिम ओभरको पहिलो ३ बलमा करणले १ छक्कासहित १० रन बटुले । उनी इनिङ्सको अन्तिम बलमा स्ट्राइक एन्डमा १ रन पूरा गर्न खोज्दा आउट भए । करणले १ चौका र ४ छक्का प्रहार गरे । उनले नन्दनले नवौं विकेटमा २४ बलमा ४७ रन जोडेका थिए । नन्दन ९ बल खेल्दा १ चौकासहित ७ रनमा अविजित रहे । ओमानका फैजल शाह, सकिल अहमद र करन सोनाभ्लेले २–२ विकेट लिए । जबाफमा ओमानले ४१ रन बनाउँदा ६ विकेट गुमाउन पुगेको थियो । करणले आफ्नो पहिलो तथा खेलको दोस्रो ओभरमै हसनाइन उल वाहबलाई शून्यमा बोल्ड गरे । नन्दनले मुजिबुर अलीलाई २ रनमा बोल्ड गरे भने हम्माद मिर्जालाई ४ रनमा एलबीडब्लू आउट गरे । कप्तान सन्दीप लामिछानेले लगातार बलमा सोनाभ्लेलाई ४ र जिकरिआ इस्लामलाई शून्यमा बोल्ड गरे । ललित राजवंशीले ओपनर जतिन्दर सिंहलाई १८ रनमा आउट गरेपछि ओमान निकै दयनीय अवस्थामा पुगेको थियो । कप्तान विनायक शुक्ला र जय ओडेडराले सातौं विकेटमा ८३ रनको साझेदारी गरेपछि मात्र ओमानको स्कोर हेर्नलायक बनेको थियो । दीपेन्द्रले ओडेडरालाई २५ रनमा एलबीडब्लू आउट गरी यो साझेदारी तोडे । उनले ५७ बल खेल्दा २ चौका प्रहार गरे । शुक्लाले ७७ रन बनाए । उनले ८३ बलमा ६ चौका र १ छक्का प्रहार गरे । नेपालबाट सन्दीप र नन्दनले ३–३ विकेट लिए । नन्दनले ६ ओभरमा १ मेडन राख्दै १२ र सन्दीपले ९ ओभरमा २८ रन खर्चे । दीपेन्द्रले ७ ओभरमा ३० रन खर्चेर २ विकेट लिए । प्लेयर अफ द म्याच करणले ६ ओभरमा २ मेडन राख्दै ८ र ललितले ६ ओभरमा ३१ रन खर्चेर १–१ विकेट लिए ।