आमिर खानका भान्जा इमरानलाई भारत छाड्न मुम्बई प्रहरीको आदेश

नयाँदिल्ली । मुम्बईमा मुख्य निर्वाचन आयुक्त ज्ञानेश कुमारविरुद्ध आयोजित प्रदर्शनमा सहभागी भएको केही दिनपछि बलिउड अभिनेता इमरान खानलाई भारत छाड्न प्रहरीले निर्देशन दिएको छ। मुम्बई प्रहरीले उनलाई अक्टोबर २८ सम्म देश छाड्न समयसीमा दिएको भारतीय सञ्चारमाध्यम एनडीटीभीले जनाएको छ। प्रहरीका अनुसार भारतीय नागरिक नभएका खानले प्रदर्शनमा सहभागी भएर अध्यागमनसम्बन्धी प्रावधान उल्लङ्घन गरेको आरोपमा उनीविरुद्ध कारबाही प्रक्रिया अघि बढाइएको हो। खान बलिउड अभिनेता आमिर खानका भान्जा हुन्। उनीसँग अमेरिकी नागरिकता र भारतीय मूलका विदेशी नागरिकका लागि जारी गरिने ओभरसिज सिटिजन अफ इन्डिया (ओसीआई) कार्ड रहेको बताइएको छ। मुम्बई प्रहरीले खानलाई अध्यागमन तथा विदेशी नागरिकसम्बन्धी ऐन, २०२५ को प्रावधानअनुसार भारत छाड्न निर्देशन दिएको हो। उक्त ऐनको दफा ७ ले भारतमा विदेशी नागरिकको प्रवेश, प्रस्थान, बसोबास तथा आवागमनलाई नियमन, प्रतिबन्धित वा निषेध गर्न भारत सरकारलाई अधिकार दिएको छ। यसअघि भारतीय जनता पार्टी (भाजपा) का नेता किरीट सोमैयाले खानविरुद्ध कानुनी कारबाहीको माग गरेका थिए। उनले अभिनेता खानले ‘अवैध राजनीतिक प्रदर्शन’ मा सहभागी भएको तथा ओसीआईसम्बन्धी प्रावधान र भिसाका सर्त उल्लङ्घन गरेको आरोप लगाएका थिए। सोमैयाले अक्टोबर ११ मा सामाजिक सञ्जालमार्फत प्रहरीमा दर्ता भएको उजुरी अपूर्ण रहेको भन्दै थप कारबाहीको माग गरेका थिए। अभिनेता खान अक्टोबर १० मा मुम्बईको अगस्त क्रान्ति मैदानमा आयोजित प्रदर्शनमा सहभागी भएका थिए। व्यङ्ग्यात्मक राजनीतिक समूह ‘कक्रोच जनता पार्टी’ (सीजेपी) ले आयोजना गरेको उक्त प्रदर्शन मुख्य निर्वाचन आयुक्त ज्ञानेश कुमारविरुद्ध केन्द्रित थियो। प्रदर्शनमा खानसँगै उनकी साथी तथा अभिनेत्री लेखा वासिङ्टन र उनकी कजिन जायन मारी खान पनि सहभागी थिए। प्रदर्शनका क्रममा प्रहरीले उनीहरूलाई नियन्त्रणमा लिएको थियो। पछि उनीहरूलाई रिहा गरिएको थियो। उक्त प्रदर्शनका क्रममा हम भारत के लोग संगठनका सदस्य तथा भारतीय कम्युनिस्ट पार्टी (मार्क्सवादी) का कार्यकर्तासहित करिब ४०० जनालाई प्रहरीले नियन्त्रणमा लिएको समाचारमा उल्लेख छ। नियन्त्रणमा परेपछि खानले प्रहरीको भ्यानभित्रबाट आफ्नो तस्बिर सार्वजनिक गर्दै ‘सायद म घुम्न जाँदै छु’ भन्ने आशयको टिप्पणी गरेका थिए। प्रदर्शनका क्रममा प्रहरीले ‘जय हिन्द’ भनेको उनको भिडियोसमेत सामाजिक सञ्जालमा भाइरल भएको थियो। सञ्चारमाध्यमसँग कुरा गर्दै खानले आफू मुम्बईको बासिन्दाका रूपमा प्रदर्शनस्थल पुगेको र आफ्नो कुनै विशेष माग नरहेको बताएका थिए। मानिसहरूको आवागमनको स्वतन्त्रता किन सीमित गरिँदै छ र उनीहरूको आवाज किन दबाइँदै छ भन्ने विषय बुझ्न आफू त्यहाँ पुगेको उनको भनाइ थियो। खानले आफूलाई नियन्त्रणमा लिएपछि अन्य व्यक्तिसहित करिब दुई घण्टासम्म प्रहरीको भ्यानमा घुमाइएको र त्यसपछि रिहा गरिएको पनि बताएका थिए।