अन्तरजातीय विवाह गर्ने २ जोडीलाई नगरपालिकाको १-१ लाख आर्थिक सहयोग

मुगु । जातीय विभेद र छुवाछुत अन्त्य गर्दै प्रेम, समानता र सामाजिक सद्भावको सन्देश दिन मुगुको छायाँनाथ रारा नगरपालिकाले अन्तरजातीय विवाह गर्ने दुई जोडीलाई आर्थिक सहयोग गरेको छ। नगरपालिकाले दुवै जोडीलाई जनही एक लाख रुपैयाँका दरले आर्थिक सहयोग प्रदान गरेको हो। छायाँनाथ रारा नगरपालिकाको दलित ऐन, २०८० अनुसार बिहीबार आयोजित कार्यक्रममा नगरप्रमुख विष्णुकुमार भाम र उपप्रमुख ऐश्वर्य मल्लले दुवै जोडीलाई एक–एक लाख रुपैयाँको चेक हस्तान्तरण गरे। सहयोग प्राप्त गर्नेमा छायाँनाथ रारा नगरपालिका–१० झाकोटका विक्रमबहादुर नेपाली र पवित्रा चौलागाईं तथा वडा नं. १३ थार्पका मानसिंह नेपाली र सरिता सेजुवाल छन्। नगरप्रमुख भामले विवाह र पारिवारिक सम्बन्धमा जातका आधारमा विभेद हुनु नहुने बताए। सबै नागरिकले समान अधिकार, सम्मान र स्वतन्त्रताका साथ बाँच्न पाउने वातावरण निर्माण गर्न नगरपालिका प्रतिबद्ध रहेको उनको भनाइ थियो। अन्तरजातीय विवाहलाई प्रोत्साहन गर्ने उद्देश्यले आर्थिक सहयोगको व्यवस्था कार्यान्वयन गरिएको उनले बताए। उपप्रमुख ऐश्वर्य मल्लले जातीय विभेद हटाउन कानुनी व्यवस्थासँगै मानिसको सोच र व्यवहारमा परिवर्तन आवश्यक रहेको बताइन्। अन्तरजातीय विवाह गर्ने जोडीलाई प्रोत्साहन गर्दा समाजमा आपसी सम्मान, समानता र सद्भाव बढाउन सहयोग पुग्ने उनको विश्वास थियो। नगरपालिकाले दलित ऐन, २०८० निर्माण गरेपछि हालसम्म अन्तरजातीय विवाह गर्ने चार जोडीलाई प्रोत्साहनस्वरूप आर्थिक सहयोग उपलब्ध गराएको जनाएको छ। नगरपालिकाको यो पहलले अन्तरजातीय विवाह गर्ने जोडीलाई आर्थिक राहत दिनुका साथै जातीय विभेद र छुवाछुतमुक्त समाज निर्माणका लागि सकारात्मक सन्देश प्रवाह गर्ने अपेक्षा गरिएको छ।