नेदरल्यान्ड्सले दिएन तीन जना रुसी जिम्न्यास्टलाई भिसा

मस्को । नेदरल्यान्ड्सले विश्व च्याम्पियन एन्जेलिना मेल्निकोभासहित तीन रुसी जिम्न्यास्टिक खेलाडीलाई भिसा दिन अस्वीकार गरेको छ । यससँगै उनीहरू अर्को साता रोटरड्याममा हुने विश्व च्याम्पियनसिपमा सहभागी हुन नपाउने रुसी जिम्यास्टिक महासंघले मंगलबार जानकारी दिएको छ । रुसी जिम्न्यास्टिक महासंघले उक्त निर्णयको कडा आलोचना गर्दै यसलाई ‘भेदभाव र समान प्रतिस्पर्धाका सिद्धान्तको उल्लंघन’ भनेको छ । महासंघले डच अधिकारीहरूमाथि प्रतियोगिताबाट सबैभन्दा बलिया जिम्न्यास्टहरूलाई जानाजानी बाहिर राख्न खोजेको आरोपसमेत लगाएको छ । महासंघले विज्ञप्तिमा जारी गर्दै भनेको छ, ‘मस्कोस्थित नेदरल्यान्ड्स दूतावासले रुसी महिला राष्ट्रिय टोलीका तीन प्रमुख खेलाडी एन्जेलिना मेल्निकोभा, भिक्टोरिया लिस्टुनोभा र अन्ना काल्मिकोभालाई भिसा जारी नगर्ने निर्णय गरेको जानकारी भिसा केन्द्रलाई दिएको छ ।’ यसबाट १७–२५ अक्टोबरसम्म रोटरड्याममा हुने विश्व आर्टिक्स जिम्न्यास्टिक च्याम्पियनसिपमा भाग लिनबाट ती खेलाडीहरू वञ्चित हुनुपरेको विज्ञप्तिमा उल्लेख छ । रुसले उक्त निर्णयविरुद्ध विश्व जिम्न्यास्टिकको नियामक निकाय र अन्तर्राष्ट्रिय ओलम्पिक कमिटी (आईओसी) मा अपिल गर्ने जनाएको छ । यसअघि अगस्टमा सन् २०२५ मा जकार्तामा भएको विश्व च्याम्पियनसिपकी विजेता मेल्निकोभालाई क्रोएसियामा आयोजित युरोपेली च्याम्पियनसिपमा सहभागी हुन सुरुमा भिसा दिन अस्वीकार गरिएको थियो । तर, अपिलपछि निर्णय उल्टाइएको थियो । उनले प्रतियोगितामा स्वर्ण पदक जितेकी थिइन् । सन् २०२२ मा युक्रेनमाथि आक्रमण सुरु गरेपछि र सन् २०१४ मा रुसको दक्षिणी सहर सोचीमा आयोजित शीतकालीन ओलम्पिकमा राज्यकै सहयोगमा डोपिङ गरिएको खुलासा भएपछि रुसी खेलाडीहरूले वर्षौंदेखि विभिन्न प्रतिबन्धको सामना गर्दै आएका छन् । पछिल्लो भिसा अस्वीकृतिको घटना रुसले अन्तर्राष्ट्रिय खेलकुदमा पुनः स्थान पाउन गरिरहेको प्रयासकै बीच भएको हो । गत जुलाईमा आईओसीले रुसी खेलाडीमाथिका प्रतिबन्धहरू केही खुकुलो बनाउँदै सन् २०२८ मा लस एन्जलसमा हुने ओलम्पिकका लागि छनोट प्रतियोगितामा सहभागी हुनसक्ने बाटो खोलेको थियो । एएफपी