हेटौँडामा श्रीमान मृत, श्रीमती घाइते अवस्थामा फेला

हेटौँडा । हेटौँडा उपमहानगरपालिका-८ भावनामार्गमा शुक्रबार बिहान एक पुरुष मृत र उनकी श्रीमती घाइते अवस्थामा फेला परेकी छन् । मृत फेला पर्नेमा ५० वर्षीय शंकर कार्की रहेका छन् भने उनकी करिब ४५ वर्षीया श्रीमती चरिमाया कार्की घाइते अवस्थामा भेटिएकी हुन् । प्रहरीकाअनुसार शंकर घरको दोस्रो तलामा फलामको डन्डीमा सलको पासो लगाई झुन्डिएको अवस्थामा फेला परेका थिए । उनकी श्रीमती चरिमाया भने भान्साकोठामा घाइते अवस्थामा भेटिएकी थिइन् । उनको मुख, टाउको र दुवै खुट्टामा चोट लागेको प्रहरीले जनाएको छ । घाइते चरिमायाले माइतीमा फोन गरेर घटनाबारे जानकारी गराएपछि माइती पक्षले हेटौँडा-९, लामसुरेमा बस्ने शंकरकी दिदी भवानी महतलाई खबर गरेका थिए । त्यसपछि भाइको घर पुगेकी भवानीले ढोका भित्रबाट बन्द रहेको पाएपछि स्थानीयलाई जानकारी गराएकी थिइन् । स्थानीयमार्फत सूचना पाएपछि घटनास्थल पुगेको प्रहरी टोलीले स्थानीय तथा शंकरका दिदी भिनाजुको रोहवरमा ढोका फोडेर घरभित्र प्रवेश गरेको थियो । त्यसक्रममा शंकर मृत र चरिमाया घाइते अवस्थामा फेला परेका प्रहरीले जनाएको छ । घटनाका बेला घरमा श्रीमान्-श्रीमती मात्रै रहेको प्रारम्भिक जानकारी प्रहरीले दिएको छ । घाइते चरिमायालाई सुरुमा उपचारका लागि हेटौँडा अस्पताल लगिएको थियो । पछि थप उपचारका लागि उनका कान्छा छोराले भरतपुर अस्पताल लगेका छन् । उनको अवस्था मध्यम रहेको प्रहरीले जनाएको छ । स्थानीयकाअनुसार घरको भान्साकोठामा रगत देखिएको थियो ।प्रहरीकाअनुसार घटनास्थलमा रगत लागेको अवस्थामा ढुंगाको लोहोरो, धारिलो हतियार र इँटासमेत फेला परेका छन् । घटनाको अनुसन्धानका लागि इलाका प्रहरी कार्यालय पशुपतिनगर र जिल्ला प्रहरी कार्यालय मकवानपुरको टोली खटिएको छ । शंकरको मृत्यु र चरिमाया घाइते हुनुको कारण तथा घटनाको वास्तविक परिस्थिति अनुसन्धानपछि मात्रै खुल्ने प्रहरीले जनाएको छ । आफन्त, स्थानीय र हेटौँडा-८ का वडाध्यक्ष राम थापाको रोहवरमा शंकरको शव हेटौँडा अस्पताल लैजाने तयारी गरिएको प्रहरीले जनाएको छ ।