स्थानीय चुनाव दलीय प्रतिस्पर्धामुक्त बनाउन उज्यालो नेपाल पार्टीकाे माग, विदेशमा रहेका नेपालीलाई मतदान अधिकार दिन आग्रह

काठमाडौं, कात्तिक ११ । उज्यालो नेपाल पार्टीले आगामी स्थानीय तहको निर्वाचन गैरदलीय प्रणालीबाट सञ्चालन गर्न र विदेशमा रहेका नेपाली नागरिकलाई मतदानको अधिकार सुनिश्चित गर्न माग गरेकाे छ । यी दुई विषयमा पार्टीका तर्फबाट निर्वाचन आयोगमा प्रमुख निर्वाचन आयुक्तसमक्ष ज्ञापनपत्र बुझाउँदै पार्टी अध्यक्ष कुलमान घिसिङले स्थानीय सरकारलाई दलीय प्रतिस्पर्धा र राजनीतिक भागबन्डाको केन्द्र नभई जनसेवा, सुशासन र स्थानीय विकासको प्रभावकारी माध्यम बनाउनुपर्ने बताउनुभएको छ । स्थानीय तहको निर्वाचनमा दलीय आबद्धताभन्दा उम्मेदवारको योग्यता, इमानदारी, क्षमता, कार्ययोजना र जनताप्रतिको जवाफदेहितालाई प्राथमिकता दिनुपर्ने उहाँको धारणा छ। ‘स्थानीय सरकार जनताको साझा सरकार बन्नुपर्छ,’ घिसिङले भन्नुभयाे, ‘स्थानीय नेतृत्व चयन गर्दा दलीय आबद्धताभन्दा उम्मेदवारको योग्यता, इमानदारी, क्षमता, स्पष्ट कार्ययोजना र जनताप्रतिको जवाफदेहितालाई प्राथमिकता दिनुपर्छ भन्ने हाम्रो मान्यता हो।’ उहाँले गैरदलीय स्थानीय निर्वाचनको प्रस्ताव बहुदलीय लोकतन्त्रको विरोध नभई स्थानीय सरकारलाई थप नागरिकमुखी, निष्पक्ष र परिणाममुखी बनाउने सुधारको अवधारणा भएको स्पष्ट पार्नुभएको छ। उज्यालो नेपाल पार्टीले विदेशमा रहेका नेपाली नागरिकलाई पनि आफ्नो स्थायी ठेगाना रहेको स्थानीय तहको निर्वाचनमा मतदान गर्न पाउने व्यवस्था सुनिश्चित गर्न पनि माग गरेको छ। रोजगारी, अध्ययन र व्यवसायलगायत विभिन्न कारणले विदेशमा रहेका नेपाली नागरिकले देशको अर्थतन्त्र तथा विकासमा महत्त्वपूर्ण योगदान गरिरहेको उल्लेख गर्दै घिसिङले उनीहरूलाई लोकतान्त्रिक प्रक्रियामा सहभागी हुने अवसर दिनुपर्ने बताउनुभयाे । ‘देशको अर्थतन्त्र र विकासमा महत्त्वपूर्ण योगदान गरिरहेका विदेशस्थित नेपाली नागरिकलाई लोकतान्त्रिक प्रक्रियामा सहभागी हुने अवसरबाट वञ्चित गरिनुहुँदैन,’ उहाँले भन्नुभयाे । विदेशमा रहेका नेपालीको मतदान अधिकार सुनिश्चित गर्न आवश्यक कानुनी, प्राविधिक र संस्थागत व्यवस्था गर्नुपर्ने पार्टीको माग छ। ज्ञापनपत्र ग्रहण गर्दै प्रमुख निर्वाचन आयुक्तले विदेशमा रहेका नेपाली नागरिकको मतदान अधिकार कार्यान्वयनका लागि सरल, सुरक्षित, कम खर्चिलो र अधिकतम सहभागिता सुनिश्चित गर्ने मतदान प्रणालीबारे आयोगले अध्ययन गरिरहेको जानकारी दिनुभएको घिसिङले उल्लेख गर्नुभयाे । निर्वाचन सुधारका लागि सरकार, निर्वाचन आयोग र राजनीतिक दलहरूबीच व्यापक छलफल, सहमति र समन्वय आवश्यक रहेको धारणा पनि प्रमुख निर्वाचन आयुक्तले व्यक्त गर्नुभएको उहाँको भनाइ छ।उज्यालो नेपाल पार्टीले दुवै विषयलाई कार्यान्वयनमा लैजान आवश्यक सुधारका लागि समयबद्ध पहल गर्न आग्रह गरेको छ। घिसिङले स्थानीय तहमा योग्य र जनउत्तरदायी नेतृत्व स्थापित गर्नुका साथै संसारको जुनसुकै कुनामा रहेका नेपाली नागरिकलाई देशको लोकतान्त्रिक प्रक्रियासँग जोड्नु पार्टीको मुख्य उद्देश्य रहेको बताउनुभएको छ। ‘हाम्रो उद्देश्य स्पष्ट छ-स्थानीय तहमा योग्य र जनउत्तरदायी नेतृत्व स्थापित गर्ने तथा संसारको जुनसुकै कुनामा रहेका नेपाली नागरिकलाई आफ्नो देशको लोकतान्त्रिक प्रक्रियासँग जोड्ने,’ उहाँकाे भनाइ छ । सुशासन, समृद्धि र सामाजिक न्यायप्रतिको प्रतिबद्धताअनुसार गैरदलीय स्थानीय निर्वाचन र विदेशमा रहेका नेपालीको मतदान अधिकारका विषयमा निरन्तर पहल गर्ने घिसिङले बताउनुभयाे ।