काठमाडौं। प्रहरीले लागुऔषध सेतो हिरोइनसहित एक जना भारतीय नागरिकलाई पक्राउ गरेको छ। पक्राउ पर्नेमा भारत महाराष्ट्र पुनेका ५२ वर्षीय रिवाराज तिघरे रहेका छन्। तिघरेलाई त्रिभुवन अन्तर्राष्ट्रिय विमानस्थल गौचरणबाट शनिबार पक्राउ गरिएको लागुऔषध नियषन्त्रण ब्युरो कोटेश्वरले जनाएको छ। प्रवक्ता प्रहरी उपरीक्षक दुर्गाराज रेग्मका अनुसार तिघरे थाइल्याण्डबाट नेपाल आएका हुन्। उनको साथबाट ५.५ किलोग्राम सेतो हिरोइन बरामद भएको रेग्मीले बताए। तिघरेले झोलाभित्र खरायो र बिरालोको खानाको प्याकेटमा सेतो हिरोइन लुकाएर ल्याएका थिए। प्रहरीका अनुसार बरामद लागुऔषध प्रतिग्राम ४० हजार रुपैयाँ बिक्री मूल्य रहेको छ। यस हिसाबले ५।५ किलोग्रामको बजार मूल्य २२ करोड रुपैयाँ हुन आउँछ। तिघरेले उक्त हिरोइन भारतीय बजारमा पुर्याउने गरेका थिए। तिघरे पक्राउ पर्नु भन्दाअघि दुई पटक नेपाल आएको र नेपालबाट हवाई र स्थलमार्गबाट हुँदै भारतसम्म पुगेको देखिएको छ। उनले यसअघि जिम्बाबे, सुडान, बंगलादेश, भियतनाम र कम्बोडियाको भ्रमण गरिसकेका थिए। प्रहरीले उनलाई हिरासतमा राखेर थप अनुसन्धान गरिरहेको छ। लागुऔषध नियन्त्रण ऐन २०३३ अनुसार बरामद हिरोइनमाथि कारबाही गर्दा कसुर ठहर भए १५ देखि जन्मकैद र ५ देखि २५ लाख रुपैयाँसम्म जरिवाना हुने व्यवस्था छ।
साढे ५ किलो सेतो हिरोइनसहित भारतीय नागरिक पक्राउ
Read Complete Original Article
Published originally on नेपालन्युज
