साउदी अरबमा नेपालीको मृत्यु प्रकरण घट्नाको एमाले र कांग्रेसद्वारा दुःख व्यक्त गर्दै निन्दा

काठमाडौं। साउदी अरबको सायबाह तेल क्षेत्रमा भएको ड्रोन आक्रमणका क्रममा खसेको भग्नावशेष लागेर एक नेपाली नागरिकको मृत्यु भएको घटनाप्रति नेकपा एमाले र नेपाली कांग्रेसले दुःख व्यक्त गरेको छ। एमालेका प्रचार विभाग प्रमुख निरज आचार्यले विज्ञप्ति जारी गर्दै मृतकप्रति भावपूर्ण श्रद्धाञ्जली अर्पण गरेका छन्। उनले शोकसन्तप्त परिवारजनप्रति हार्दिक समवेदना पनि प्रकट गरेका छन्। विज्ञप्तिमा निर्दोष नागरिकको ज्यान जाने गरी हुने हिंसात्मक घटना मानवता र मानवीय मूल्य–मान्यताविपरीत भएको उल्लेख छ। एमालेले विश्व शान्तिको पक्षमा रहेको जनाउँदै यस्ता अमानवीय घटनाको निन्दा र भर्त्सना गरेको छ। नेपाल प्रत्यक्ष रूपमा संलग्न नरहेको वैदेशिक द्वन्द्वका कारण नेपाली नागरिकले ज्यान गुमाउनुपर्ने अवस्था दुःखद र चिन्ताजनक रहेको एमालेको भनाइ छ। वैदेशिक रोजगारीमा रहेका नेपाली कामदारको सुरक्षा र हित सुनिश्चित गर्न एमालेले नेपाल सरकारको गम्भीर ध्यानाकर्षणसमेत गराएको छ। त्यस्तै नेपाली कांग्रेसले कांग्रेसले निर्दोष नागरिकलाई निशाना बनाउने यस्ता हिंसात्मक घटनाले मानवता र मानवीय मूल्य मान्यतामाथि प्रहार गरेको जनाएको छ। कांग्रेसले नेपाल सरकारसँग मृतक नेपाली नागरिकको शव स्वदेश ल्याउने व्यवस्था मिलाउन तथा साउदी अरबमा कार्यरत सम्पूर्ण नेपाली नागरिकको सुरक्षा सुनिश्चित गर्न आवश्यक पहल गर्न माग गरेको छ। कांग्रेस सभापति गगनकुमार थापाले मृतक नेपाली नागरिकप्रति श्रद्धाञ्जली अर्पण गर्दै साउदी अरबमा कार्यरत नेपाली नागरिकको सुरक्षाका लागि गम्भीर पहल गर्न सरकारको ध्यानाकर्षण गराएको पार्टीका कार्यवाहक मुख्यसचिव कृष्णप्रसाद दुलालद्वारा जारी विज्ञप्तिमा उल्लेख छ।