सवारी दुर्घटनामा नौ जनाको मृत्यु

काठमाडौं।देशका सात जिल्लामा भएका छुट्टाछुट्टै सवारी दुर्घटनामा नौ जनाको मृत्यु भएको छ। सिन्धुलीमा तीन तथा सुनसरी, उदयपुर, धनुषा, मोरङ, रौतहट र रोल्पामा एक–एक जनाको ज्यान गएको हो। सिन्धुलीको फिक्कल गाउँपालिका–६, नागथानस्थित सडकमा आइतबार बिहान सुमो दुर्घटना हुँदा तीन जनाको घटनास्थलमै मृत्यु भएको छ। काठमाडौंबाट खोटाङतर्फ जाँदै गरेको को१ज २९७६ नम्बरको सुमो अनियन्त्रित भई दुर्घटना भएको प्रहरीले जनाएको छ। मृत्यु हुनेमा खोटाङको दिक्तेल रूपाकोट मझुवागढी नगरपालिका–५ की २१ वर्षीया युपना राई पनि छन्। दुर्घटनामा घाइते भएका चालकसहित दुई जनाको जिल्ला अस्पताल सिन्धुली र अन्य दुई जनाको काठमाडौंस्थित राष्ट्रिय ट्रमा सेन्टरमा उपचार भइरहेको छ।सुनसरीको इनरुवा नगरपालिका–४, बसचोकमा शनिबार ट्रकले मोटरसाइकललाई ठक्कर दिँदा ५० वर्षीया रितादेवी यादवको मृत्यु भएको छ। इनरुवा–९, बबियाकी यादवको जिल्ला अस्पताल सुनसरीमा उपचारका क्रममा मृत्यु भएको हो। मोटरसाइकल चालक घाइते भएका छन्। ट्रक चालकलाई प्रहरीले नियन्त्रणमा लिएको छ। उदयपुरको कटारी नगरपालिका–५, भोर्लेमा शनिबार राति मोटरसाइकल र विद्युतीय गाडी ठोक्किँदा ३० वर्षीय सुमन श्रेष्ठको मृत्यु भएको छ। कटारी–५ का श्रेष्ठको कटारी अस्पतालमा उपचारका क्रममा मृत्यु भएको हो। प्रहरीले गाडी चालकलाई नियन्त्रणमा लिएको छ। धनुषाको जनकपुरधाम उपमहानगरपालिका–१७, तेतरिया पुलमा शनिबार राति दुई मोटरसाइकल ठोक्किँदा १८ वर्षीय सुजित यादवको मृत्यु भएको छ। जनकपुरधाम–१७ का यादवको प्रादेशिक अस्पताल जनकपुरमा उपचारका क्रममा मृत्यु भएको हो। दुर्घटनामा घाइते अन्य तीन जनाको विभिन्न अस्पतालमा उपचार भइरहेको छ। मोरङको सुनवर्षी नगरपालिका–५, झुङ्गी टोलमा शनिबार राति दुई मोटरसाइकल ठोक्किँदा ४७ वर्षीय शिवकुमार मण्डलको मृत्यु भएको छ। सुनवर्षी–९, डाइनियाका मण्डलको कोशी अस्पताल विराटनगरमा उपचारका क्रममा मृत्यु भएको हो। दुर्घटनामा घाइते अन्य दुई जनाको उपचार भइरहेको छ। रौतहटको मौलापुर नगरपालिका–२, मर्यादपुरमा शनिबार राति मोटरसाइकल अनियन्त्रित भई दुर्घटना हुँदा ७० वर्षीया सोमरियादेवी ठाकुरको मृत्यु भएको छ। फतुवा विजयपुर नगरपालिका–२, शीतलपुरकी ठाकुरको बाराको कलैयास्थित अस्पतालमा उपचारका क्रममा मृत्यु भएको हो। दुर्घटनामा घाइते अन्य दुई जनाको उपचार भइरहेको छ। रोल्पाको माडी गाउँपालिका–१, चालाङ भीरमा आइतबार बिहान अटो दुर्घटना हुँदा ३२ वर्षीया खुमाकुमारी भण्डारीको मृत्यु भएको छ। घर्तीगाउँबाट पेदिखोलातर्फ जाँदै गरेको अटो दुर्घटना हुँदा माडी–१, घोर्नेटीकी भण्डारी घाइते भएकी थिइन्। उनको स्मृति अस्पताल घर्तीगाउँमा उपचारका क्रममा मृत्यु भएको हो। अटोमा सवार अर्की एक घाइतेको रोल्पा अस्पतालमा उपचार भइरहेको छ। प्रहरीले चालकलाई नियन्त्रणमा लिएको छ। सबै दुर्घटनाबारे अनुसन्धान भइरहेको प्रहरीले जनाएको छ।