सम्पत्ति छानबिनमा दोषी देखिए राजनीति छाडेर भाँडा माझ्न तयार छु : राजेन्द्र लिङ्देन

काठमाडौं । राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले आफ्नो सम्पत्ति छानबिन गर्न सरकारलाई पुनः चुनौती दिनुभएको छ । सम्पत्ति छानबिनका क्रममा भ्रष्टाचार गरेको प्रमाणित भए राजनीति छाडेर विपक्षीको घरमा भाँडा माझ्नसमेत तयार रहेको उहाँले बताउनुभएको छ । बुधबार राप्रपा काठमाडौं जिल्ला समितिद्वारा आयोजित कार्यक्रमलाई सम्बोधन गर्दै अध्यक्ष लिङ्देनले आफू र आफ्नो पार्टी भ्रष्टाचारविरुद्ध दृढतापूर्वक उभिने बताउनुभयो । उहाँले संसद्मा प्रतिनिधित्व गरेदेखि नै सार्वजनिक पदमा रहेका व्यक्तिहरूको सम्पत्ति छानबिन हुनुपर्ने आवाज उठाउँदै आएको स्मरण गराउनुभयो । सबैभन्दा पहिले आफ्नै सम्पत्ति छानबिन गर्नुपर्ने माग आफूले निरन्तर राख्दै आएको उहाँको भनाइ थियो । सरकारले गठन गरेको सम्पत्ति छानबिन आयोगको काम रोकिएकोप्रति प्रश्न उठाउँदै लिङ्देनले आफूले स्वेच्छाले सम्पत्ति विवरण बुझाइसकेको जानकारी दिनुभयो । उहाँले भन्नुभयो, ‘नेताहरूको सम्पत्ति छानबिन हुनुपर्छ भन्ने आवाज संसद्बाटै निरन्तर उठाउँदै आएको छु । सबैभन्दा पहिले आफ्नै र राष्ट्रिय प्रजातन्त्र पार्टीका अध्यक्षको सम्पत्ति छानबिन गर्नुपर्छ भन्ने मेरो माग आज पनि कायम छ । छानबिनबाट भ्रष्टाचार प्रमाणित भए जुनसुकै सजाय भोग्न तयार छु ।’ आफू सिद्धान्त, वचन र व्यवहार तीनै पक्षबाट भ्रष्टाचारविरोधी रहेको दाबी गर्दै उहाँले राप्रपा पनि भ्रष्टाचारविरुद्ध दृढतापूर्वक अघि बढ्नुपर्ने बताउनुभयो । यसैगरी, पार्टीको आगामी महाधिवेशनका सन्दर्भमा बोल्दै अध्यक्ष लिङ्देनले नेता तथा कार्यकर्तालाई संयमित रहन आग्रह गर्नुभयो । उहाँले नेतृत्व चयन सहमतिका आधारमा गर्नुपर्ने र सहमति हुन नसके स्वस्थ प्रतिस्पर्धामार्फत नेतृत्व चयन गर्नुपर्ने धारणा राख्नुभयो । महाधिवेशनमा नेतृत्वका आकांक्षीहरूले व्यक्तिगत स्वार्थका लागि एकअर्काको मानमर्दन गर्ने तथा पार्टीको मनोबल कमजोर बनाउने गतिविधि गर्न नहुने उहाँको भनाइ थियो । ‘अब हाम्रो मुख्य लक्ष्य पार्टीको महाधिवेशन सफलतापूर्वक सम्पन्न गर्नु हो । नेतृत्व चयन सहमतिबाट हुन सके राम्रो हुन्छ, नभए स्वस्थ प्रतिस्पर्धामार्फत नेतृत्व चयन गर्नुपर्छ’, उहाँले भन्नुभयो । पार्टीको एकता, प्रतिष्ठा र हितलाई सर्वोपरि राखेर अघि बढ्नुपर्नेमा जोड दिँदै लिङ्देनले आगामी दिनमा राप्रपाले भ्रष्टाचारविरुद्धको मुद्दालाई प्रमुखताका साथ उठाउने बताउनुभयो ।