विजयादशमीले सांस्कृतिक सम्बन्ध पुस्तान्तरणमा सहयोग पुर्‍याउँछ : मुख्यमन्त्री कार्की

काठमाडौं। कोशी प्रदेशका मुख्यमन्त्री हिक्मतकुमार कार्कीले विजयादशमी पर्वले पारिवारिक आत्मीयता र आपसी सम्मान अभिवृद्धि गर्दै सांस्कृतिक सम्बन्धलाई पुस्तान्तरण गर्न महत्वपूर्ण भूमिका खेल्ने विश्वास व्यक्त गरेका छन् । विजयादशमीका अवसरमा सम्पूर्ण नेपालीलाई सुख, शान्ति, समृद्धि, सुस्वास्थ्य र दीर्घायुको शुभकामना व्यक्त गर्दै मुख्यमन्त्री कार्कीले असत्यमाथि सत्यको विजयका रूपमा मनाइने यस पर्वले सबैलाई सत्यको मार्गमा अघि बढ्न प्रेरणा प्रदान गर्ने बताएका हुन् । विजयादशमीको अवसरमा जारी शुभकामना सन्देशमा उनले विविध जातजाति, भाषा, धर्म, संस्कृति र परम्पराले समृद्ध नेपाली समाजमा बडादसैँजस्ता चाडपर्वले आपसी सद्भाव, सहिष्णुता, प्रेम र एकताको भावना अभिवृद्धि गर्न महत्वपूर्ण योगदान पुर्‍याउँदै आएको उल्लेख गरेका छन् । मुख्यमन्त्री कार्कीले मौलिक चाडपर्व धार्मिक तथा सांस्कृतिक आस्थाका प्रतीक मात्र नभई सामाजिक एकता, राष्ट्रिय पहिचान र साझा नेपालीपनका आधारसमेत रहेको बताएका छन् । “हाम्रा मौलिक चाडपर्व केवल धार्मिक तथा सांस्कृतिक आस्थाका प्रतीक मात्र होइनन्, सामाजिक एकता, राष्ट्रिय पहिचान र साझा नेपालीपनका आधार पनि हुन्,” उनले सन्देशमा भनेका छन् । यस्ता पर्वले समाजमा सकारात्मक सोच, आपसी सहयोग र सहकार्यको भावना जागृत गराउँदै सुखी, समुन्नत र समृद्ध समाज निर्माणका लागि सबैलाई प्रेरित गर्ने मुख्यमन्त्री कार्कीको विश्वास छ । विविधतायुक्त नेपाली समाजमा चाडपर्वले पारस्परिक सद्भाव र सामाजिक एकतालाई बलियो बनाउनुका साथै मौलिक संस्कृति, परम्परा र सांस्कृतिक मूल्य–मान्यतालाई नयाँ पुस्तासम्म पुर्‍याउन सहयोग गर्ने उनको सन्देशको आशय छ ।