विजयादशमीमा प्रधानमन्त्री बालेनको सन्देश : भ्रष्टाचार र कुशासन हटाउन एकजुट बनौँ

काठमाडौं । प्रधानमन्त्री वालेन्द्र शाह (बालेन) ले विजयादशमीको अवसरमा स्वदेश तथा विदेशमा रहेका सम्पूर्ण नेपालीलाई सुख, शान्ति, समृद्धि र उत्तरोत्तर प्रगतिको शुभकामना व्यक्त गरेका छन्। विजयादशमीका अवसरमा शुभकामना सन्देश जारी गर्दै प्रधानमन्त्री शाहले समाजमा व्याप्त भ्रष्टाचार, कुशासन, ढिलासुस्ती, असमानता तथा राजनीतिक विकृति अन्त्य गर्न सबै एकजुट हुनुपर्नेमा जोड दिएका छन्। उनले प्रत्येक नागरिकले सरकार आफ्नै साथमा रहेको अनुभूति गर्न सक्ने वातावरण निर्माण गर्न आवश्यक रहेको बताएका छन्। प्रधानमन्त्री शाहका अनुसार यस्ता विकृति र विसङ्गति अन्त्य गर्न इमानदार प्रयास, दृढ सङ्कल्प र सामूहिक मेहनत आवश्यक छ। उनले वास्तविक परिवर्तनका लागि सोचमा मात्र नभई व्यवहारमा समेत परिवर्तन ल्याउनुपर्नेमा जोड दिएका छन्। विजयादशमीलाई असत्यमाथि सत्यको विजयको प्रतीकका रूपमा उल्लेख गर्दै प्रधानमन्त्री शाहले पौराणिक मान्यताअनुसार दुर्गा भवानीले महिषासुरमाथि र भगवान् रामले रावणमाथि विजय प्राप्त गरेको प्रसङ्ग स्मरण गरेका छन्। उनले विजयादशमीमा मान्यजनबाट टीका, जमरा र आशीर्वाद ग्रहण गर्ने परम्पराले सत्कर्मको मार्गमा अघि बढ्न तथा सत्यको पक्षमा उभिन प्रेरणा दिने विश्वास व्यक्त गरेका छन्। साथै, टाढा रहेका आफन्त तथा मान्यजनसँग भेटघाट गर्ने यस पर्वको परम्पराले पारिवारिक सम्बन्ध र आपसी आत्मीयता थप प्रगाढ बनाउने बताएका छन्। प्रधानमन्त्री शाहले विजयादशमीले मानिसभित्र रहेका अहंकार, लोभ, ईर्ष्या, हिंसा र विभेदजस्ता नकारात्मक प्रवृत्ति त्याग्दै सकारात्मक सोच, सद्भाव र सहकार्यलाई आत्मसात् गर्न प्रेरणा दिने विश्वास व्यक्त गरेका छन्। उनले चाडपर्वको यस पावन अवसरमा सबै नेपालीलाई आपसी एकता, सद्भाव र सहकार्यका साथ समुन्नत राष्ट्र निर्माणमा योगदान दिनसमेत आह्वान गरेका छन्।