विजयादशमीको शुभकामना दिँदै प्रम बालेन भन्छन् – ‘भ्रष्टाचार, कुशासन र विभेदविरुद्ध एकजुट बनौँ’

काठमाडौं । प्रधानमन्त्री बालेन्द्र शाह (बालेन) ले विजयादशमीको अवसरमा भ्रष्टाचार, कुशासन, ढिलासुस्ती, असमानता र राजनीतिक विकृति अन्त्य गर्न सबै नेपाली एकजुट हुनुपर्ने बताएका छन् । उनले परिवर्तनका लागि सोच मात्र नभई व्यवहारसमेत बदल्न आवश्यक रहेको सन्देश दिएका छन् । विजयादशमीको शुभकामना सन्देश जारी गर्दै प्रधानमन्त्री शाहले चाडपर्वलाई परम्परागत उत्सवमा मात्र सीमित नराखी समाज र राज्यमा रहेका विकृति हटाउने अवसरका रूपमा लिनुपर्नेमा जोड दिएका छन् । हरेक नागरिकले राज्य आफ्नो साथमा रहेको महसुस गर्ने वातावरण निर्माण गर्नु आवश्यक रहेको उनको सन्देश छ । उनले विजयादशमीले मानिसमा रहेका अहंकार, लोभ, ईष्र्या, हिंसा र विभेदजस्ता नकारात्मक प्रवृत्ति त्याग्न प्रेरित गर्ने उल्लेख गरेका छन् । पौराणिक मान्यताअनुसार दुर्गा भवानीले महिषासुर र भगवान् रामले रावणमाथि विजय प्राप्त गरेको प्रसङ्ग स्मरण गर्दै उनले सत्य र सत्कर्मको विजयको कामना गरेका छन् । प्रधानमन्त्री शाहको सन्देशले चाडपर्वको धार्मिक र सांस्कृतिक महत्त्वसँगै सुशासन, सामाजिक न्याय र सार्वजनिक उत्तरदायित्वको विषयलाई पनि जोड दिएको छ । भ्रष्टाचार र कुशासनजस्ता विकृतिलाई आधुनिक समाजका आसुरी प्रवृत्तिका रूपमा व्याख्या गर्दै उनले तिनको अन्त्यका लागि इमानदार प्रयास, दृढ अठोट र सामूहिक मेहनत आवश्यक रहेको बताएका छन् । उनले विजयादशमीलाई सामाजिक सद्भाव, राष्ट्रिय एकता र पारिवारिक आत्मीयता अभिवृद्धि गर्ने अवसरका रूपमा समेत चित्रण गरेका छन् । भौगोलिक, सांस्कृतिक र भाषिक विविधताबीच सबै वर्ग, समुदाय र क्षेत्रका नागरिकलाई एउटै सूत्रमा बाँध्न यस पर्वले महत्त्वपूर्ण भूमिका खेल्ने उनको भनाइ छ । वर्षौँदेखि टाढिएका आफन्त, साथीभाइ र मान्यजनसँग पुनर्मिलन गर्ने अवसरका रूपमा रहेको विजयादशमीले आपसी सम्मान, माया र सद्भाव बढाउने विश्वास पनि उनले व्यक्त गरेका छन् । अन्त्यमा प्रधानमन्त्री शाहले सबै नेपालीलाई आफ्नो क्षमता र परिस्थितिअनुसार विजयादशमी मनाउँदै एकता, सद्भाव, सम्मान र प्रेम साटासाट गर्न आह्वान गरेका छन् । उनको शुभकामना सन्देशले दसैँको टीका, जमरा र आशीर्वादसँगै मुलुकमा व्याप्त विकृति अन्त्य गर्ने सामूहिक संकल्पलाई समेत प्राथमिकता दिएको छ ।