राष्ट्रसङ्घले प्रतिबन्ध लगाएका अखलाघी बने इरानका नयाँ रक्षामन्त्री, अमेरिकालाई दिए कडा चेतावनी

काठमाडौं- इरानका नवनियुक्त रक्षामन्त्री मेहरदाद अखलाघीले अमेरिकाले इरानविरुद्ध सैन्य कारबाही पुनः सुरु गरेमा अमेरिका र मध्यपूर्वमा रहेका उसका सहयोगीहरूले ठूलो क्षति बेहोर्नुपर्ने चेतावनी दिएका छन् । इरानी संसदबाट विश्वासको मत प्राप्त गरेपछि आइतबार पत्रकारहरूसँग कुरा गर्दै अखलाघीले अमेरिकाले इरानमाथि पुनः आक्रमण गर्ने सम्भावना न्यून रहेको बताए । तर त्यस्तो कदम चालिए अमेरिका र सम्पूर्ण क्षेत्रले गम्भीर परिणाम भोग्नुपर्ने उनको भनाइ थियो । ‘जनता ढुक्क भएहुन्छ, उनीहरूले हामीमाथि आक्रमण गर्ने आँट गर्ने सम्भावना निकै कम छ । तर यदि उनीहरूले त्यसो गरे भने उनीहरू आफैं र सम्पूर्ण क्षेत्रले ठूलो क्षति बेहोर्नुपर्नेछ’, अखलाघीले भने । इरानी संसद्का सदस्यहरूले उनलाई नयाँ रक्षामन्त्रीका रूपमा नियुक्त गर्न अनुमोदन गरेका हुन् । सरकारी टेलिभिजनका अनुसार आइतबार भएको मतदानमा उनले खसेको कुल २७७ मतमध्ये २३७ मत प्राप्त गरेका थिए । उनले रक्षा तथा सशस्त्र बलको रसदसम्बन्धी मन्त्रालयको जिम्मेवारी सम्हाल्नेछन् । अखलाघीले पूर्वरक्षामन्त्री अजिज नासिरजादेहको स्थान लिएका छन् । नासिरजादेहको फेब्रुअरी २८ मा अमेरिका र इजरायलले गरेको आक्रमणमा मृत्यु भएको थियो । उक्त आक्रमणमा इरानका तत्कालीन सर्वोच्च नेता आयातोल्लाह अली खामेनीसहित वरिष्ठ सैन्य कमान्डरहरू पनि मारिएका थिए । इरानको सरकारी समाचार संस्था आईएसएनएका अनुसार मतदानअघि अखलाघीले आफूले जिम्मेवारी पाए देशको रक्षाका लागि संवेदनशील परिस्थितिको गहन विश्लेषण र पूर्ण तयारी आवश्यक हुने बताएका थिए । उनले वर्तमान परिस्थितिको सही मूल्याङ्कन, घटनाक्रम पछाडिका कारणको बुझाइ, प्रभाव पार्ने प्रवृत्तिको पहिचान तथा भविष्यमा उत्पन्न हुनसक्ने विभिन्न अवस्थाको सामना गर्ने तयारीलाई देशको रक्षाका लागि महत्वपूर्ण मानेका छन् । सैन्य दर्जा नभए पनि अखलाघीले इरानको रक्षा मन्त्रालयमा ४२ वर्ष काम गरिसकेका छन् । सन् २०१३ देखि उनले इरानको सरकारी हतियार उत्पादक निकाय रक्षा उद्योग सङ्गठनको नेतृत्वसमेत सम्हाल्दै आएका छन् । संयुक्त राष्ट्रसङ्घले सन् २००७ मा परमाणु तथा ब्यालेस्टिक क्षेप्यास्त्रसम्बन्धी गतिविधिमा संलग्न रहेको आरोपमा अखलाघीमाथि प्रतिबन्ध लगाएको थियो । अमेरिका र इजरायलको आक्रमणपछि इरानले प्रतिकारस्वरूप विभिन्न सैन्य कारबाही सञ्चालन गरेको थियो । यस्तो अवस्थामा नयाँ रक्षामन्त्रीको चेतावनीले मध्यपूर्वमा पुनः सैन्य तनाव बढ्नसक्ने चिन्ता थपिएको छ ।