रारा गइरहेकाे हाइलक्स खस्यो, तीन जनाको मृत्यु

मुगु । मुगुमा हाइलक्स गाडी दुर्घटना हुँदा तीन जनाको मृत्यु भएको छ भने दुई जना घाइते भएका छन् । जिल्ला प्रहरी कार्यालय मुगुका अनुसार शुक्रबार दिउँसो करिब ४ः४५ बजे छायानाथ रारा नगरपालिका–७ टोप्लास्थित ताल्चा–रारा कच्ची सडकखण्डमा गाडी दुर्घटना भएको हो । सुर्खेतबाट रारातर्फ जाँदै गरेको बा १७ च १८६४ नम्बरको हाइलक्स गाडी अनियन्त्रित भएर सडकबाट करिब ६ सय मिटर तल खसेको थियो । दुर्घटनामा काठमाडौंको कलंकीका ५० वर्षीय विजय बस्नेत, ५४ वर्षीय रमेश बिडारी र ५० वर्षीय पूर्णकुमार थापाको मृत्यु भएको जिल्ला प्रहरी कार्यालय मुगुका प्रहरी नायब उपरीक्षक रवि राज थपलियाले जानकारी दिएका छन् । दुर्घटनामा ललितपुर महानगरपालिका–१५ का ५८ वर्षीय चालक कञ्चन थापा र सोही ठाउँकी ५४ वर्षीया अञ्जु थापा मध्यम घाइते भएका छन् । दुर्घटनापछि घटनास्थल पुगेको प्रहरी टोलीले गाडीमा सवार पाँचै जनाको उद्धार गरी जिल्ला अस्पताल मुगु पुर्‍याएको थियो । अस्पतालले तीन जनालाई मृत घोषणा गरेको हो । गाडी दुर्घटना हुनुको कारण खुल्न नसकेको प्रहरीले जनाएको छ । घटनाबारे थप अनुसन्धान भइरहेको छ ।