युक्रेनमा सैन्य लक्ष्य प्राप्त गरेरै छाड्ने पुटिनको सन्देश

काठमाडौं । रुसी राष्ट्रपति भ्लादिमिर पुटिनले रुस युक्रेनसँग वार्ता गर्न र समाधान खोज्न तयार रहेको बताएका छन् । यद्यपि, उनले रुसले आफ्ना निर्धारित सैन्य लक्ष्य जुनसुकै अवस्थामा पनि हासिल गरेरै छाड्ने दृढता व्यक्त गरेका छन् । पुटिनले हालै मस्कोमा अमेरिकी राष्ट्रपति डोनाल्ड ट्रम्पका विशेष दूत स्टिभ विटकफसँग युक्रेनसँग हुन सक्ने सम्भावित सम्झौताबारे विस्तृत छलफल गरेका थिए । यसै विषयमा रुसी पत्रकार पाभेल जारुबिनसँग कुरा गर्दै पुटिनले युक्रेन युद्धको समाधान खोज्न रुस अमेरिका र युक्रेनबीचको त्रिपक्षीय वार्ताका लागि तयार रहेको बताएका छन् । पत्रकारसँगको कुराकानीमा राष्ट्रपति पुटिनले भने, “मलाई लाग्छ, हामी सम्झौतामा पुग्न सक्छौँ । तर, कसैले यसलाई अर्कै तरिकाले अघि बढाउन चाहन्छ भने त्यसका लागि पनि हामी तयार छौँ । जुनसुकै परिस्थितिमा पनि हामी आफ्ना सैन्य लक्ष्य हासिल गर्नेछौँ । अमेरिकी प्रतिनिधिसँगको वार्तामा हामी त्रिपक्षीय छलफलका लागि तयार रहेको बताएका छौँ । सम्झौताको मुख्य उद्देश्य युद्धलाई केही समयका लागि रोक्नु मात्र नभई रुस र युक्रेन दुवैको दीर्घकालीन सुरक्षा सुनिश्चित गर्नु हुनुपर्छ । यसबारे छलफल गर्न हामी तयार छौँ ।” राष्ट्रपति पुटिनले आफूहरूले सुरुदेखि नै शान्तिपूर्ण समाधानको पक्षमा आवाज उठाउँदै आएको दाबी गरे । उनले भने, “हामी सुरुदेखि नै शान्तिपूर्ण समाधानको वकालत गर्दै आएका छौँ । सन् २०१४ मा पनि हामीले यसबारे कुरा गरेका थियौँ, तर उनीहरूले आम नागरिकविरुद्ध बन्दुक र लडाकु विमान प्रयोग गरे । उनीहरूले लगभग युद्ध नै सुरु गरेका थिए । त्यसपछि मिन्स्क सम्झौता भयो। डोनबास क्षेत्रमा पुनः सैन्य कारबाही सुरु हुनुअघि पनि हामीले सम्झौताको कुरा गरेका थियौँ, तर युक्रेनले लड्ने बतायो। त्यसैले ठीकै छ ।” पुटिनले अमेरिकी प्रतिनिधिसँगको छलफलमा रुस र युक्रेनको भविष्यको सुरक्षा प्रत्याभूतिबारे कुरा गर्दा युरोपेली सुरक्षालाई पनि समेट्नुपर्ने विषय उठाइएको बताए । युक्रेनी नागरिकसँगको ऐतिहासिक तथा सांस्कृतिक सम्बन्धबारे बोल्दै पुटिनले भने, “हामी यो जटिल विषयमा वार्ता गर्न तयार छौँ, किनकि युक्रेनका जनता हाम्रा अत्यन्त निकट छन् । हालै गरिएको एउटा आनुवंशिक अनुसन्धानले पनि रुस र युक्रेनका मानिसहरू एउटै हुन् भन्ने देखाएको छ । तर, उनीहरू आफूलाई फरक रूपमा हेर्न चाहन्छन् भने त्यो पनि ठीकै छ । हामी हरेक परिस्थितिका लागि तयार छौँ ।”