भारतमा विपक्षी नेता राहुल गान्धीद्वारा नोभेम्बर १ मा ‘भोट बचाऊ’ र्‍यालीको आह्वान

काठमाडौं । भारतीय विपक्षी नेता राहुल गान्धीले ‘भोट बचाऊ’ र्‍यालीको आह्वान गरेका छन् । सत्तारूढ भारतीय जनता पार्टी (भाजपा) र निर्वाचन आयोगमाथि मतदाता नामावलीमा धाँधली गरेको आरोप लगाउँदै नोभेम्बर १ मा नयाँ दिल्लीमा हुने ‘भोट बचाऊ, देश बचाऊ’ र्‍यालीमा सहभागी हुन उनले सर्वसाधारणलाई आह्वान गरेका छन् । कांग्रेस नेता गान्धीले आइतबार सामाजिक सञ्जाल एक्समार्फत विद्यार्थी, किसान, श्रमिक, महिला, युवा र व्यापारीलाई रामलीला मैदानमा हुने र्‍यालीमा सहभागी हुन आग्रह गरेका छन् । “मतदाता नामावलीबाट सर्वसाधारणका नाम हटाइएका छन् । नियम र कानुन मिचिएका छन्,” उनले लेखेका छन्, “जनताले अब यो अत्याचार चुपचाप सहने छैनन् ।” निर्वाचन आयोगले सञ्चालन गरिरहेको विशेष गहन संशोधन (एसआईआर) प्रक्रियाले योग्य मतदातालाई मताधिकारबाट वञ्चित गर्न सक्ने र भाजपालाई फाइदा पुग्ने विपक्षी दलहरूको आरोप छ । प्रारम्भिक तथ्यांकअनुसार मस्यौदा मतदाता नामावलीबाट १३ करोडभन्दा बढी नाम हटाइएको दाबी गरिएको छ । यसै महिनाको सुरुमा विपक्षी गठबन्धनले प्रमुख निर्वाचन आयुक्त ज्ञानेश कुमारमाथि पदीय दुरुपयोगको आरोप लगाउँदै नयाँ दिल्लीमा प्रदर्शन गरेको थियो । प्रदर्शनकारीहरूले उनको राजीनामा माग गरेका थिए । निर्वाचन आयोगले भने मतदाता नामावली शुद्धीकरण र अद्यावधिक गर्न एसआईआर प्रक्रिया सञ्चालन गरिएको बताउँदै आएको छ । यसैबीच, अक्टोबर २४ मा हैदराबादमा नागरिक समाज, मानव अधिकारकर्मी, किसान, दलित, युवा तथा विद्यार्थी संगठनले मानव साङ्लो बनाएर एसआईआरविरुद्ध प्रदर्शन गरेका छन् । प्रदर्शनकारीहरूले यस प्रक्रियाले तेलंगनाका करिब आधा मतदातालाई मताधिकारबाट वञ्चित गर्न सक्ने आशंका व्यक्त गरेका छन् । उनीहरूले शान्तिपूर्ण प्रदर्शन नागरिकको संवैधानिक अधिकार भएको भन्दै प्रदर्शनकारीमाथि, विशेषगरी दिल्लीमा प्रहरीले गरेको बल प्रयोगको आलोचना गरेका छन् । तेलंगनामा एसआईआर प्रक्रिया जारी छ । त्यहाँको अन्तिम मतदाता नामावली नोभेम्बर ९ मा प्रकाशित गर्ने कार्यतालिका छ । डीडब्ल्यू