बहुमत नपाएपछि धाँधली भएको नेतन्याहुको आरोप

काठमाडौं । इजरायलमा भएको निर्वाचनको ९७ प्रतिशत मतगणना सकिँदा प्रधानमन्त्री बेन्जामिन नेतन्याहुको लिकुड पार्टी नेतृत्वको गठबन्धनले बहुमत प्राप्त गर्न सकेको छैन । त्यसपछि नेतन्याहुले अरब पार्टीहरूमाथि चुनावमा धाँधली गरेको आरोप लगाएका छन् । नेतन्याहुले सामाजिक सञ्जाल एक्समार्फत जारी गरेको विज्ञप्तिमा आतंकवादलाई समर्थन गर्ने र यहुदी राज्य समाप्त पार्न चाहने अरब पार्टीहरूले मत ‘चोरेको’ आरोप लगाएका हुन् । उनले घुसखोरी, धम्की, हिंसा, जालसाजी र मतदाता परिचालन गर्न प्रतिबन्धित सफ्टवेयर प्रयोग गरिएको दाबी गरेका छन् । लिकुड पार्टीले चुनावमा धाँधली भएको भन्दै सयौँ उजुरी र प्रमाण प्रहरी, आन्तरिक सुरक्षा निकाय शिन बेट तथा केन्द्रीय निर्वाचन समितिमा बुझाइरहेको नेतन्याहुले बताएका छन् । केही अरब मतदान केन्द्रमा मतपत्र र नगदसहितका हजारौँ खाम फेला परेको, मतदान केन्द्रका कर्मचारीलाई धम्की तथा हिंसा गरिएको, दोहोरो पहिचानमा मतदान भएको र मतदाताको सङ्ख्या तथा मतपत्रका खामको सङ्ख्यामा फरक देखिएको लगायतका घटना भएको उनको दाबी छ । नेतन्याहुले यी आरोपको गहिरो अनुसन्धान गरी दोषीमाथि कानुनी कारबाही गर्न सम्बन्धित निकायसँग माग गरेका छन् । मतगणनाको ९७ प्रतिशत परिणामअनुसार नेतन्याहु नेतृत्वको गठबन्धनले ५३ सिट, उनका प्रतिद्वन्द्वी आइजेनकोट नेतृत्वको गठबन्धनले ४८ सिट र अरब पार्टीहरूको गठबन्धनले १९ सिट प्राप्त गरेका छन् । इजरायली संसद्‌मा सरकार गठनका लागि १२० मध्ये कम्तीमा ६१ सिट आवश्यक पर्छ । हालको परिणामअनुसार कुनै पनि प्रमुख गठबन्धनले एक्लै बहुमत हासिल गर्न सकेको छैन ।