बलिवुड अभिनेता टाइगर श्राफको गाडीमा पाँच राउन्ड गोली प्रहार, चालक घाइते

काठमाडौं । भारतीय अभिनेता टाइगर श्राफको गाडीमा मुम्बईको जुहूस्थित पुष्पा पार्क क्षेत्रमा पाँच राउन्ड गोली प्रहार भएको छ । घटनामा उनका चालक र नजिकै रहेका एक अटोचालक घाइते भएका छन् । टाइगर भने सुरक्षित रहेको भारतीय सञ्चारमाध्यमले जनाएका छन् । समाचारअनुसार, फुटबल खेलेर गाडीमा फर्किरहेका टाइगरको गाडीलाई लक्षित गरी मोटरसाइकलमा आएका तीन जनाले अचानक गोली चलाएका थिए । घाइतेहरूलाई तत्कालै नजिकैको अस्पताल पुर्‍याइएको थियो । घटनापछि प्रहरीले उक्त क्षेत्रलाई घेराबन्दी गरी आक्रमणकारीको खोजी थालेको छ । प्रहरीले आसपासका निगरानी क्यामेराका दृश्य जाँच गर्नुका साथै प्रत्यक्षदर्शीसँग सोधपुछ गरिरहेको छ । भारतीय सञ्चारमाध्यमका अनुसार, लरेन्स गिरोहका अनिल पण्डित र हरमन सन्धुले सामाजिक सञ्जालमार्फत घटनाको जिम्मेवारी लिएको दाबी गरिएको छ । सार्वजनिक गरिएको भनिएको सन्देशमा सलमान खानसँग काम गर्ने र गिरोहको कुरा नसुन्ने चलचित्र क्षेत्रका व्यक्तिहरूलाई लक्षित गर्ने धम्कीसमेत दिइएको उल्लेख छ । यद्यपि, घटनाको कारण र आक्रमणकारीको संलग्नताबारे प्रहरीले आधिकारिक रूपमा पुष्टि गरेको छैन । टाइगर श्राफ अभिनेता ज्याकी श्राफका छोरा हुन्। उनी हिन्दी चलचित्र क्षेत्रमा अभिनय र नृत्यका लागि परिचित छन् । The post बलिवुड अभिनेता टाइगर श्राफको गाडीमा पाँच राउन्ड गोली प्रहार, चालक घाइते appeared first on Corporate Khabar : Nepals First Corporate News Magazine and Portal.