काठमाडौं, कात्तिक २६ । नक्कली भुटानी शरणार्थी प्रकरणमा दोषी ठहर भई कैद सजाय भुक्तान गरिरहेका पूर्वउपप्रधानमन्त्री टोपबहादुर रायमाझी ज्येष्ठ नागरिकले पाउने कानुनी सुविधाका आधारमा जेलमुक्त हुनुभएको छ। ६५ वर्ष उमेर पूरा भएपछि कानुनअनुसार प्राप्त हुने कैद छुट सुविधाका आधारमा रायमाझी बिहीबार बिहान ७ बजे डिल्लीबजार कारागारबाट रिहा हुनुभएको हो। अदालतबाट प्राप्त आदेश र संशोधित कैदीपुर्जीका आधारमा उहाँलाई रिहा गरिएको कारागार प्रशासनले जनाएको छ। तिहारअघि नै अदालतबाट रायमाझीकाे रिहाइसम्बन्धी पत्र जेलमा पुगेकाे थियाे। सोही आदेशअनुसार आवश्यक प्रक्रिया पूरा गरी रायमाझीलाई कारागारमुक्त गरिएको हो। ज्येष्ठ नागरिकका रूपमा पाउने कैद छुट सुविधाका लागि रायमाझीले अदालतमा निवेदन दिनुभएको थियो। उक्त निवेदनमाथि सुनुवाइ गर्दै काठमाडौँ जिल्ला अदालतले प्रचलित कानुनी व्यवस्थाअनुसार सुविधा प्रदान गर्ने निर्णय गरेको थियो। कारागारबाट बाहिरिएपछि रायमाझीलाई परिवार तथा आफन्तले घरमा टीका र मालासहित स्वागत गर्नु भएकाे छ । तत्कालीन नेकपा एमालेका सचिवसमेत रहनुभएका रायमाझी सांसद रहेकै अवस्थामा नक्कली भुटानी शरणार्थी प्रकरणमा पक्राउ पर्नुभएको थियो। उक्त प्रकरणमा ठगी, संगठित अपराध, राज्यविरुद्धको कसुर तथा एकीकृत कसुरमा दोषी ठहर गर्दै काठमाडौँ जिल्ला अदालतले उहाँलाई विभिन्न कसुरमा कैद तथा जरिवानाको सजाय सुनाएको थियो। अदालतको फैसलाअनुसार ठगीमा दुई वर्ष कैद र २० हजार रुपैयाँ जरिवाना, संगठित अपराधमा तीन वर्ष कैद र ३० हजार रुपैयाँ जरिवाना, राज्यविरुद्धको कसुरमा एक वर्ष छ महिना कैद र १५ हजार रुपैयाँ जरिवाना तथा एकीकृत कसुरतर्फ चार वर्ष कैद र ४० हजार रुपैयाँ जरिवाना तोकिएको थियो।
पूर्वउपप्रधानमन्त्री टोपबहादुर रायमाझी जेलमुक्त
Read Complete Original Article
Published originally on जनताटाइम्स
