ट्रम्पमाथि स्विस मोडलले लगाइन् बलात्कारकाे आरोप

काठमाडौं । अमेरिकी राष्ट्रपति डोनाल्ड ट्रम्पमाथि यौन दुर्व्यवहार, यौन आक्रमण र बलात्कारलगायतका आरोप लगाउने ११ महिलाको बयान अमेरिकी संसद्को तल्लो सदन हाउस अफ रिप्रेजेन्टेटिभ्सको न्यायिक समितिका डेमोक्र्याट सदस्यहरूले सार्वजनिक गरेको प्रतिवेदनमा समेटिएको छ । प्रतिवेदनअनुसार पाँच महिलाले बलात्कार वा यौन आक्रमणको आरोप लगाएका छन् । तर ह्वाइट हाउसले भने सबै आरोप अस्वीकार गर्दै प्रतिवेदनलाई राजनीतिक उद्देश्यबाट प्रेरित प्रयास भनेको छ । प्रतिवेदनमा स्विट्जरल्यान्डकी पूर्व मोडल तथा सौन्दर्य प्रतियोगिताकी प्रतिस्पर्धी बिएट्रिस केउलको आरोप विशेष रूपमा उल्लेख गरिएको छ । उनले सन् १९९३ नोभेम्बरमा न्युयोर्कस्थित प्लाजा होटलमा ट्रम्पले आफूलाई बलात्कार गरेको दाबी गरेकी छन् । केउलका अनुसार सन् १९९३ मा ट्रम्पद्वारा आयोजित ‘अमेरिकन ड्रीम पेजेन्ट’सँग सम्बन्धित कार्यक्रममा उनको ट्रम्पसँग भेट भएको थियो । त्यसबेला २४ वर्षकी रहेकी उनले ट्रम्पले अमेरिकाको भिसा प्राप्त गर्न र न्युयोर्क विश्वविद्यालयमा अध्ययन गर्न सहयोग गर्ने आश्वासन दिएको बताएकी छन् । उनको दाबीअनुसार सोही कार्यक्रममा यौन अपराधमा दोषी ठहरिएका जेफ्री एपस्टिनसँग पनि भेट भएको थियो । एपस्टिनले आफूलाई ट्रम्पको निकट साथीका रूपमा परिचय दिएको र पार्टीमा सहभागी हुन निम्तो दिएको उनले बताएकी छन् । प्रतिवेदनमा उल्लेख भएअनुसार कार्यक्रमपछि ट्रम्पका एक प्रतिनिधिले उनलाई होटलको कोठामा भेट्न बोलाएका थिए । शैक्षिक तथा व्यावसायिक अवसरबारे छलफल हुने अपेक्षासहित आफू त्यहाँ पुगेको केउलको भनाइ छ । तर, कोठामा ट्रम्पले पछाडिबाट समातेर बलात्कार गरेको र आफू घाइते भएको उनको आरोप छ । केउलले घटनापछि ट्रम्पले आफूलाई सहयोग गर्ने आश्वासन दोहोर्‍याउँदै घटनाबारे कसैलाई नबताउन दबाब दिएको दाबी गरेकी छन् । उनले ट्रम्पले ‘कार्यक्रम चलिरहनुपर्छ’ भन्ने आशयको अभिव्यक्ति दिएको पनि बताएकी छन् । त्यसपछि स्विट्जरल्यान्ड फर्किएकी उनले ट्रम्पले पछि पनि सम्पर्क गरेर सहयोगको प्रस्ताव दोहोर्‍याएको तर आफूले अस्वीकार गरेको बताएकी छन् । केउलले यसअघि सन् २०२४ मा सार्वजनिक रूपमा ट्रम्पमाथि आफूलाई जबर्जस्ती चुम्बन गर्ने र शरीरमा अनुचित रूपमा छुने गरेको आरोप लगाएकी थिइन् । तर, त्यसबेला उनले बलात्कारको आरोप लगाएकी थिइनन् । पछिल्लो प्रतिवेदनमा भने उनले पहिलोपटक सार्वजनिक रूपमा बलात्कारको आरोप लगाएको उल्लेख छ । उनले लामो समयसम्म धम्की र दबाबको डरले आफ्ना अनुभव सार्वजनिक गर्न नसकेको बताएकी छन् । प्रतिवेदनका अनुसार केउलको बयान समितिका कर्मचारीले गरेको अन्तर्वार्तामा आधारित छ । घटनाको समयमा होटलको कोठामा के भएको थियो भन्ने प्रत्यक्षदर्शीको बयान प्रतिवेदनमा उल्लेख छैन । सन् १९९३ मा ट्रम्पसँग खिचिएको एउटा तस्बिर पनि समावेश गरिएको छ, जसले उनीहरूबीच भेट भएको देखाए पनि कथित यौन आक्रमण पुष्टि गर्दैन । उनले विगतमा आफ्नो अनुभव सुनाएको बताउने केही व्यक्तिका भनाइ र अन्य घटनासँगका समानतालाई पनि प्रतिवेदनमा उल्लेख गरिएको छ । यता ह्वाइट हाउसकी प्रवक्ता लरेन बिसले आरोप अस्वीकार गर्दै प्रतिवेदनलाई अमेरिकी जनताको ध्यान अन्यत्र मोड्ने राजनीतिक प्रयास भनेकी छन् । ट्रम्पले आफूमाथिका आरोप अस्वीकार गर्दै आएका छन् । यसअघि सन् २०२४ मा ट्रम्पको चुनावी अभियानले पनि केउलका प्रारम्भिक आरोपलाई असत्य भनेको थियो । न्यायिक समितिका शीर्ष डेमोक्र्याट सदस्य जेमी रस्किनको नेतृत्वमा तयार पारिएको प्रतिवेदनमा ट्रम्प र एपस्टिनबीचको कथित सम्बन्धबारे अनुसन्धान गर्न न्याय मन्त्रालयलाई स्वतन्त्र विशेष अभियोजक नियुक्त गर्न माग गरिएको छ । डेमोक्र्याटहरू प्रतिनिधिसभामा अल्पमतमा रहेकाले उनीहरूले मात्र यस्तो नियुक्ति अनिवार्य गराउन सक्दैनन् ।