ट्रम्पद्वारा ले पेनको प्रशंसा

वासिङटन।अमेरिकी राष्ट्रपति डोनाल्ड ट्रम्पले फ्रान्सेली दक्षिणपन्थी नेतृ मरिन ले पेनलाई ‘रूढीवादी आवाज’ भन्दै प्रशंसा गरेका छन्। तर सन् २०२७ को फ्रान्सेली राष्ट्रपति निर्वाचनमा उनलाई समर्थन गर्ने विषयमा भने ट्रम्पले स्पष्ट धारणा व्यक्त गरेनन्। अमेरिकामा मध्यावधि निर्वाचन नजिकिँदै गर्दा ट्रम्पले फ्रान्सको अशान्तिलाई आप्रवासन र वामपन्थी राजनीतिविरुद्ध आफ्नो धारणा राख्ने अवसरका रूपमा प्रस्तुत गर्दै आएका छन्। ले पेनलाई समर्थन गर्नु हुन्छ कि भनेर पत्रकारले सोध्दा ट्रम्पले आफूले उनलाई नभेटेको बताउँदै उनीमाथि अन्याय भएको जस्तो लागेको उल्लेख गरे। सन् २०२५ मार्चमा भ्रष्टाचारको अभियोगमा दोषी ठहर भएकी ५८ वर्षीया ले पेनलाई सुरुमा पाँच वर्षसम्म निर्वाचनमा उम्मेदवार बन्न प्रतिबन्ध लगाइएको थियो। तर यस वर्ष पुनरावेदन अदालतको निर्णयले उनलाई सन् २०२७ को राष्ट्रपति निर्वाचनमा प्रतिस्पर्धा गर्ने बाटो खुलेको छ। आफैले पनि अमेरिकी न्याय प्रणाली राजनीतिक उद्देश्यका लागि प्रयोग भइरहेको आरोप लगाउँदै आएका ट्रम्पले ले पेनको मुद्दालाई त्यही सन्दर्भमा जोडे। उनले हालै दक्षिण अमेरिकाका निर्वाचनमा आफूले समर्थन गरेका दक्षिणपन्थी नेताहरूको सफलताको पनि उल्लेख गरे। फ्रान्सको अशान्तिबारे ट्रम्पले भने, “त्यो सामान्य दङ्गा वा विरोध प्रदर्शन थिएन, क्रान्ति जस्तै थियो र अझै जारी छ।” यसअघि कान्सासमा आयोजित चुनावी सभामा उनले फ्रान्स आप्रवासी, जिहादी र कम्युनिस्टहरूबाट कब्जा गरिएको, लुटिएको र जलाइएको आरोप लगाएका थिए । –रासस /एएफपी