कोजाग्रत पूर्णिमामा यस पटक कांग्रेसको चियापान कार्यक्रम नहुने

काठमाडौं।नेपाली कांग्रेसले यस वर्ष कोजाग्रत पूर्णिमाका अवसरमा आयोजना गर्दै आएको चियापान कार्यक्रम स्थगित गर्ने निर्णय गरेको छ। देशका विभिन्न क्षेत्रमा बाढी–पहिरोले ठूलो जनधनको क्षति पुर्‍याएको र मुलुक शोकमा रहेकाले कार्यक्रम नगर्ने निर्णय गरिएको पार्टीले जनाएको छ। कांग्रेसका कार्यवाहक मुख्यसचिव कृष्णप्रसाद दुलालले जारी गरेको सूचनामा भोटेकोसी र बूढीगण्डकीमा आएको बाढीबाट ठूलो क्षति भएको उल्लेख छ। विपद्का कारण जनधनको क्षति भएको तथा धेरै मानिस बेपत्ता रहेको अवस्थामा यस वर्ष चियापान कार्यक्रम नगर्ने निर्णय गरिएको सूचनामा जनाइएको छ। कांग्रेसले चियापान कार्यक्रमको ऐतिहासिक पृष्ठभूमि स्मरण गर्दै पार्टीका संस्थापक नेता बीपी कोइरालाले राष्ट्रिय एकता तथा मेलमिलापको नीति लिएर २०३३ पुस १६ गते स्वदेश फर्किएपछि २०३४ सालको कोजाग्रत पूर्णिमादेखि चियापान समारोह सुरु गरेको जनाएको छ। आपसी सद्भाव र सौहार्दता अभिवृद्धि गर्नुका साथै शुभकामना आदानप्रदान गर्ने उद्देश्यले सुरु भएको उक्त कार्यक्रम केही वर्ष बाहेक हरेक वर्ष आयोजना हुँदै आएको थियो। यसैबीच, कांग्रेस सभापति गगनकुमार थापाले शोकको यस घडीमा चाडपर्व मनाउँदा भड्किलो शैली अपनाउनुको सट्टा शान्त र संयमित रूपमा परिवारमा सीमित रहेर मनाउन आग्रह गरेका छन्। विपद्बाट प्रभावित नागरिकप्रति संवेदनशील हुँदै चाडपर्व मनाउन उनले आग्रह गरेका हुन्।