काठमाडौंलाई दौडिएर मात्र होइन, महसुस गरेर अपनत्व लिनुपर्छ : सुनिता डंगोल

<p>काठमाडौं महानगरपालिकाकी कार्यवाहक प्रमुख सुनिता डंगोलले काठमाडौंका ऐतिहासिक गल्ली, मन्दिर, सम्पदा र संस्कृति सहरको पहिचान मात्र नभई यहाँको मौलिक जीवनशैलीसमेत भएको बताएकी छन् । उनले काठमाडौंलाई दौडिएर मात्र नभई यहाँको संस्कृति, परम्परा र जनजीवनलाई गहिरोसँग महसुस गरेर अपनत्व लिनुपर्नेमा जोड दिएकी हुन् ।</p> <p>काठमाडौं महानगरपालिकाले आयोजना गरेको १० किलोमिटर लामो ‘हेरिटेज रन’ का अवसरमा बोल्दै कार्यवाहक प्रमुख डंगोलले नागरिक, सम्पदा र संस्कृतिलाई केन्द्रमा राखेर महानगरले विभिन्न कार्यक्रम सञ्चालन गरिरहेको बताइन् ।</p> <p>उनका अनुसार काठमाडौंका मन्दिर, ऐतिहासिक गल्ली, भजन–कीर्तन, परम्परागत खानपान र बिहानीपखको मौलिक वातावरणले सहरलाई जीवन्त बनाएको छ । पैदल हिँड्दा वा दौडिँदा सहरको वास्तविक पहिचानसँग नजिक हुन सकिने उनको भनाइ छ ।</p> <p>‘हेरिटेज रन केवल दौड प्रतियोगिता होइन, काठमाडौंको संस्कृति, सम्पदा र जनजीवनसँग जोडिने अवसर हो,’ डंगोलले भनिन्, ‘हाम्रो उद्देश्य दौडिनु मात्र नभई काठमाडौंलाई महसुस गर्नु र यसप्रति अपनत्व बढाउनु हो ।’</p> <p>वसन्तपुर क्षेत्रबाट सुरु भएको हेरिटेज रनमा विभिन्न उमेर समूहका धावकहरूको उल्लेख्य सहभागिता रहेको थियो । कार्यक्रममा हजुरबुवा–हजुरआमादेखि नातिनातिनासम्मका तीन पुस्ताले उत्साहपूर्वक सहभागिता जनाएका थिए । ७५ वर्षका ज्येष्ठ नागरिकदेखि युवा तथा बालबालिकासम्मले १० किलोमिटरको दूरी पार गरेका थिए ।</p> <p>महानगरपालिकाका अनुसार अनलाइन दर्ता खुला गरिएको २४ घण्टाभित्रै निर्धारित सहभागिता कोटा पूरा भएपछि दर्ता बन्द गर्नुपरेको थियो । नागरिकको यस्तो उत्साहजनक सहभागिताले आगामी दिनमा थप रचनात्मक कार्यक्रम सञ्चालन गर्न प्रेरणा मिलेको डंगोलले बताइन् ।</p> <p>महानगरपालिकाले हेरिटेज रनलाई आगामी कात्तिक १३ देखि १५ गतेसम्म आयोजना हुने ‘काठमाडौं फिल्म फेस्टिभल’ को प्रवद्र्धनात्मक कार्यक्रमका रूपमा समेत अघि बढाएको छ । खेलकुद, साहित्य, कला र सम्पदालाई चलचित्रमार्फत एकाकार गर्ने उद्देश्यले महोत्सव आयोजना गर्न लागिएको डंगोलले जानकारी दिइन् ।</p> <p>काठमाडौं महानगरपालिकाले आयोजना गर्न लागेको काठमाडौं फिल्म फेस्टिभलमा नेपाली तथा अन्तर्राष्ट्रिय गरी ४० वटा चलचित्र निःशुल्क प्रदर्शन गरिने भएको छ ।</p> <p>महोत्सवको पहिलो दिन वसन्तपुर डबलीमा खुला आकाशमुनि विशेष स्क्रिनिङमार्फत उद्घाटन कार्यक्रम आयोजना गरिनेछ । दोस्रो र तेस्रो दिन भने ऐतिहासिक राष्ट्रिय सभागृह तथा जय नेपाल सिनेमा हलमा चलचित्र प्रदर्शन गरिने महानगरपालिकाले जनाएको छ ।</p> <p>राष्ट्रिय सभागृहमा विशेषगरी ७० र ८० को दशकका मौलिक नेपाली चलचित्रहरू निःशुल्क प्रदर्शन गरिनेछ । त्यस्तै, जय नेपाल सिनेमा हलमा अन्तर्राष्ट्रिय चलचित्रसहित विभिन्न विधाका चलचित्र प्रदर्शन गरिने कार्यक्रम रहेको छ ।</p> <p>महोत्सवमा सहभागी हुन इच्छुक दर्शकले महानगरपालिकाको आधिकारिक सामाजिक सञ्जाल पेजमार्फत निःशुल्क अनलाइन टिकट बुक गर्न सक्ने व्यवस्था मिलाइएको छ ।</p> <p>डंगोलले चलचित्रप्रेमी, कलाकार तथा आम नागरिकलाई परिवार र साथीभाइसँगै महोत्सवमा सहभागी हुन आग्रह गरेकी छन् ।</p> <p>‘काठमाडौंलाई हेरौँ, सुनौँ, महसुस गरौँ र यसको सम्पदासँग जोडिऔँ,’ उनले भनिन् ।</p> <p>महानगरपालिकाले हेरिटेज रन र फिल्म फेस्टिभलजस्ता कार्यक्रममार्फत काठमाडौंको मौलिक पहिचान, ऐतिहासिक सम्पदा र सांस्कृतिक जीवनशैलीलाई प्रवद्र्धन गर्दै नागरिकलाई आफ्नो सहरसँग थप नजिक बनाउने लक्ष्य लिएको जनाएको छ ।</p>