कांग्रेसभित्र एकताको प्रयास जारी छ, तर एउटै विषयमा अल्झिएर बस्दैनौँ: प्रदीप पौडेल

काठमाडौं। नेपाली कांग्रेसका महामन्त्री प्रदीप पौडेलले पार्टीभित्र एकता कायम गर्ने प्रयास निरन्तर जारी रहेको बताएका छन्। शुक्लागण्डकी नगर समितिद्वारा आयोजित कार्यक्रममा उनले कांग्रेसलाई थप सुदृढ र जनताप्रति उत्तरदायी बनाउन आफूहरू प्रतिबद्ध रहेको बताए। पौडेलले पार्टीभित्रको आन्तरिक एकताका लागि प्रयास भइरहेको भए पनि एउटै विषयमा मात्र अल्झिएर बस्न नहुनेमा जोड दिए। उनले भने, ‘बाटो फरक भए पनि हाम्रो गन्तव्य एउटै हो। कांग्रेससँग रिसाएका जनतालाई फेरि आकर्षित गर्न आवश्यक योजना ल्याउँछौँ।’ महामन्त्री पौडेलले जनतालाई कांग्रेस रुपान्तरण भएको अनुभूति दिलाउनु आजको आवश्यकता भएको बताए। उनले सबै पक्षसँग सहमति र सहकार्य गर्दै देशलाई समृद्ध बनाउने लक्ष्यमा अघि बढ्नुपर्ने बताएका छन्। वर्तमान सरकारको स्थिरताका विषयमा टिप्पणी गर्दै पौडेलले सरकार पाँच वर्षसम्म चल्नुपर्ने धारणा राखे। उनले सरकारको स्थिरताका पक्षमा कांग्रेस रहेको उल्लेख गर्दै सरकारले कुनै गलत काम गरेमा भने पार्टीले निरन्तर खबरदारी गर्ने स्पष्ट पारे। सो कार्यक्रममा कांग्रेसका केन्द्रीय सदस्य दीपक भट्टराई, निवर्तमान केन्द्रीय सदस्य ध्रुव वाग्ले, निवर्तमान जिल्ला सभापति वैकुण्ठ न्यौपाने, गण्डकी प्रदेशसभा सदस्य श्यामराजा महत र राष्ट्रिय स्वतन्त्र पार्टीका गण्डकी प्रदेश सहमहामन्त्री शङ्कर पन्तले चाडपर्वले एकता र सद्भावको भावना बढाउने बताएका थिए।