काठमाडौं । नेकपा एमालेका अध्यक्ष केपी शर्मा ओलीले गत वर्षको जेनजी आन्दोलनका क्रममा राष्ट्रपति भवनको सुरक्षा गर्न नसकेको विषयमा नेपाली सेनाले नै जवाफ दिनुपर्ने बताएका छन्। बिहीबार काठमाडौंमा आयोजित एमालेको राष्ट्रिय भेलालाई सम्बोधन गर्दै ओलीले जेनजी आन्दोलनका क्रममा भएका केही घटना रहस्यमय रहेको टिप्पणी गरे। आन्दोलनका नाममा राष्ट्रका ऐतिहासिक संरचनामा आगजनी भए पनि त्यसबारे उचित छानबिन नभएको भन्दै उनले असन्तुष्टि जनाए। ‘२३ गते त्यत्रा मान्छे कसले मार्यो ?’ भन्दै प्रश्न गरेका ओलीले अर्को दिन आगजनी गर्न स्कुले विद्यार्थीलाई झोला बोकाएर ल्याइएको आरोप लगाए। तत्कालीन सभापति शेरबहादुर देउवालाई घरमै पुगेर कुटपिट गरिँदासमेत राज्यको उपस्थिति नदेखिनु लज्जास्पद भएको उनको भनाइ थियो। भदौ २४ गते राष्ट्रपति निवासको सुरक्षामाथि प्रश्न उठाउँदै उनले बाहिर आगजनी गर्न दिने तर भित्र राष्ट्रपति बस्नुपर्ने अवस्था कसरी आयो भन्दै प्रश्न गरे। राष्ट्रपति निवासको सुरक्षा गर्न नसकिएको विषयमा सेनाले जवाफ दिनुपर्ने र भैरवनाथ गणमा राष्ट्रपतिलाई राख्दैमा सुरक्षा सुनिश्चित नहुने उनले बताए। ओलीले राजनीतिलाई व्यवस्थित बनाउन र समाजलाई सही दिशामा अघि बढाउन राजनीतिक दल अपरिहार्य रहेको बताए। कुनै पनि तहमा निर्दलीय शासन सम्भव नहुने उल्लेख गर्दै उनले संविधान र लोकतन्त्र मिचिने अवस्था सिर्जना भएको टिप्पणी गरे। अहिले राजनीतिक दललाई अस्वीकार गर्ने, भीडतन्त्रबाट राज्य सञ्चालन गर्न खोज्ने तथा पपुलिस्ट र अराजक प्रवृत्ति बढिरहेको उनको भनाइ थियो। एमाले टिकट बेच्ने पार्टी नभएको दाबी गर्दै ओलीले उम्मेदवार छनोट निश्चित प्रक्रिया र मापदण्डका आधारमा हुने बताए। आर्थिक लेनदेन वा अनुचित तरिकाबाट टिकट वितरण हुने गरेको आरोप अस्वीकार गर्दै उनले एमाले अवाञ्छित गतिविधिबाट लाभ लिने पार्टी नभएको जिकिर गरे। यसैगरी, संविधान र लोकतान्त्रिक प्रणालीको रक्षा गर्नु एमालेको पहिलो कार्यभार भएको ओलीले बताएका छन्। राष्ट्रिय भेलामा पार्टीका तत्कालीन दुई कार्यभार र गर्नुपर्ने १५ कामबारे चर्चा गर्दै उनले एमाले निर्वाचनमा पराजित भएको नभई धक्का खाएर अपदस्थ भएको दाबी गरे। नियमित र स्वाभाविक निर्वाचनमा हारजित स्वीकार गर्नुपर्ने भए पनि गत फागुनको निर्वाचन त्यस्तो नभएको उनको आरोप थियो। आगजनी, तोडफोड र हिंसात्मक गतिविधिबाट सत्ता परिवर्तन गरी आतंकपूर्ण वातावरणमा निर्वाचन गराएर परिणाम घोषणा गरिएको उनले बताए।
ओलीको नजरमा जेनजी आन्दोलनका घटना रहस्यमय, भने- ‘२३ गते त्यत्रा मान्छे कसले मार्यो ?’

Read Complete Original Article
Published originally on केन्द्रबिन्दु






