एल क्लासिकोमा एम्बाप्पेको निर्णायक प्रदर्शन

लण्डन । किलियन एम्बाप्पेले दुई गोल गरेपछि रियल मड्रिडले स्पेनिस ला लिगाको चर्चित भिडन्त एल क्लासिकोमा बार्सिलोनालाई उसकै घरेलु मैदानमा २-१ ले पराजित गरेको छ । आइतबार राती क्याम्प नोउमा भएको खेलमा एम्बाप्पेले ४१औँ र ८७औँ मिनेटमा गोल गर्दै रियललाई महत्त्वपूर्ण तीन अंक दिलाउनुभयो । यो सिजन लिगमा अपराजित रहेको बार्सिलोना घरेलु समर्थकमाझ पहिलो हार बेहोर्न बाध्य भयो । जितसँगै रियलले अंकतालिकामा आफ्नो स्थिति बलियो बनाएको छ भने बार्सिलोनालाई शीर्ष स्थानमा अग्रता बढाउने अवसरबाट वञ्चित गरेको छ । खेलको पहिलो हाफमा दुवै टोलीले गोलका अवसर सिर्जना गरे पनि रियलले त्यसको सदुपयोग गर्न सफल भयो । ४१औँ मिनेटमा यान डिओमान्डेको लो क्रस क्लियर गर्ने क्रममा बार्सिलोनाका रक्षक जेरार्ड मार्टिनको शरीरमा लागेको बल एम्बाप्पेसँग ठोक्किएर गोलमा परिणत भएको थियो । त्यससँगै रियलले अग्रता लियो । पहिलो गोलपछि एम्बाप्पेले अर्को उत्कृष्ट अवसर पनि सिर्जना गर्नुभएको थियो । उहाँको प्रहार पोष्टमा लागेर फर्कियो । अर्कोतर्फ बार्सिलोनाका युवा फरवार्ड लामिन यमलले नजिकबाट गोल गर्ने अवसर गुमाउँदा घरेलु टोली पहिलो हाफमै बराबरी गर्नबाट चुक्यो । दोस्रो हाफमा बार्सिलोनाले आक्रामक खेल प्रस्तुत गर्‍यो । लगातार गोलको प्रयास गरे पनि हान्सी फ्लिकको टोलीले रियलको रक्षापंक्ति तोड्न संघर्ष गर्नुपर्‍यो । रियलका गोलरक्षक आन्द्रे लुनिनले आधा दर्जनभन्दा बढी प्रहार विफल पार्दै टोलीलाई खेलमा कायम राख्नुभयो । ६१औँ मिनेटमा बार्सिलोनाले बराबरी गोल फर्कायो । पेड्रीको उत्कृष्ट पासमा कप्तान राफिन्हाले पेनाल्टी क्षेत्रभित्रबाट सहज गोल गर्दै खेल १-१ को स्थितिमा पुर्‍याउनुभयो । त्यसपछि घरेलु टोलीले खेलमा दबाब बढाए पनि गोल गर्न सकेन । खेल बराबरीमा सकिने संकेत देखिएका बेला एम्बाप्पेले निर्णायक प्रहार गर्नुभयो । ८७औँ मिनेटमा जुड बेलिङ्घमले सुरु गरेको आक्रमणलाई वैकल्पिक खेलाडी एडुआर्डो कामाभिङ्गाले चलाखीपूर्ण पासमार्फत् अघि बढाउनुभयो । त्यसमा एम्बाप्पेले सहज गोल गर्दै रियललाई २-१ को अग्रता दिलाउनुभयो । बाँकी समयमा बार्सिलोनाले बराबरी गोल फर्काउन सकेन । रियलका पहिलो रोजाइका गोलरक्षक थिबाउ कोर्टुवा बिरामी भएका कारण खेल्न नसकेपछि लुनिनले पोष्ट सम्हाल्नुभएको थियो । उहाँले उत्कृष्ट बचाउ गर्दै टोलीको जितमा महत्त्वपूर्ण योगदान दिनुभयो । जितसँगै रियलले बार्सिलोनालाई सन् १९६८-६९ को कीर्तिमान बराबरी गर्नबाट रोकेको छ । उक्त सिजन रियलले लिगको सुरुवातमा लगातार नौ खेल जितेको थियो । यस सिजन बार्सिलोना पनि बराबरी गर्ने लक्ष्यमा थियो । एम्बाप्पेले सन् २०२४ मा पेरिस सेन्ट जर्मेन (पिएसजी) छाडेर रियल पुगेयता बार्सिलोनाविरुद्ध सात खेलमा आठ गोल गरिसक्नुभएको छ । यो सिजन ला लिगामा उहाँको गोलसंख्या ११ पुगेको छ । राफिन्हा भने १३ गोलसहित सर्वाधिक गोलकर्ताको सूचीमा अगाडि हुनुहुन्छ । ला लिगामा १० खेलपछि बार्सिलोना २७ अंकसहित शीर्ष स्थानमा कायम छ । दोस्रो स्थानमा रहेको एट्लेटिको मड्रिडको २५ अंक छ । एजेन्सी