इजरायलमा ७२ प्रतिशत मतगणना हुँदा नेतान्याहु र आइसेनकोटमा काे कति अगाडि ?

काठमाडौं । इजरायलको निर्वाचनमा प्रधानमन्त्री बेन्जामिन नेतान्याहुको दक्षिणपन्थी गठबन्धन अगाडि देखिए पनि सरकार गठनका लागि आवश्यक बहुमत जुट्ने अवस्था स्पष्ट भएको छैन । प्रारम्भिक मतगणनाले नेतान्याहुको गठबन्धन विपक्षी गादी आइसेनकोट नेतृत्वको समूहभन्दा केही अगाडि देखाएको छ । तर कुनै पनि पक्षले स्पष्ट बहुमत हासिल गर्ने संकेत देखिएको छैन । अलजजिराका अनुसार, करिब ७२ प्रतिशत मतगणना हुँदा नेतान्याहुको गठबन्धनले ५४ सिट, आइसेनकोटको समूहले ४८ सिट र अरब दलहरूले १८ सिट प्राप्त गरेका छन् । इजरायलको संसद् नेसेटमा बहुमतका लागि ६१ सिट आवश्यक पर्छ । त्यसैले सरकार गठन गर्न दलहरूबीच गठबन्धन निर्माण निर्णायक हुने देखिएको छ । नेतान्याहुले दक्षिणपन्थी दलहरूले यहुदी मतदातामाझ निर्णायक समर्थन प्राप्त गरेको दाबी गर्दै ‘राष्ट्रिय दक्षिणपन्थी सरकार’ गठनको आह्वान गरेका छन् । \ तर विपक्षी नेता आइसेनकोटले जनताले परिवर्तनका पक्षमा मत दिएको दाबी गरेका छन् । उनले नेतान्याहुलाई राजनीतिक स्वार्थका लागि राष्ट्रिय सुरक्षाको प्रयोग नगर्न चेतावनीसमेत दिएका छन् । आइसेनकोटका अनुसार, निर्वाचन परिणामले नेतान्याहुप्रति जनताको अविश्वास देखाएको छ । उनले दोस्रो पटक निर्वाचन गराउनु उपयुक्त नहुने बताउँदै छिट्टै सरकार गठनको प्रयास गर्ने बताएका छन् । यसैबीच, वामपन्थी डेमोक्रेट्स पार्टीका नेता याइर गोलानले नेतान्याहुलाई सत्ताबाट हटाउन विपक्षी दलहरूलाई अरब दलसँग सहकार्य गर्न आग्रह गरेका छन् । उनले यहुदी र अरब मतदाताबीच विभाजन सिर्जना गर्ने राजनीति त्यागेर अरब नागरिकलाई पनि सरकार गठनको प्रक्रियामा सहभागी गराउनुपर्ने बताएका छन् । तर नेतान्याहु र आइसेनकोट दुवैले अरब दलहरूसँग गठबन्धन नगर्ने बताउँदै आएका छन् । यस्तो अवस्थामा अरब दलहरूले सरकार गठनमा निर्णायक भूमिका खेल्न सक्ने विश्लेषकहरूको आकलन छ । निर्वाचनमा करिब ७८ प्रतिशत मतदान भएको छ, जुन सन् १९९९ यताकै उच्च मतदानदर हाे । इजरायलको राजनीतिक नेतृत्व, सुरक्षा नीति र प्यालेस्टिनी क्षेत्रमा जारी युद्धप्रतिको दृष्टिकोणलाई लिएर मतदाताबीच गहिरो विभाजन रहेको निर्वाचन परिणामले देखाएको छ । अन्तिम मतपरिणाम बिहीबारसम्म सार्वजनिक हुने अपेक्षा गरिएको छ भने आधिकारिक परिणाम नोभेम्बर ४ मा प्रकाशित गरिनेछ । त्यसपछि राष्ट्रपति आइज्याक हर्जोगले दलका नेताहरूसँग परामर्श गरी सरकार गठन गर्न सक्ने सम्भावना भएको उम्मेदवारलाई जिम्मेवारी दिनेछन् । चयन भएको उम्मेदवारले सरकार गठनका लागि अधिकतम ४२ दिन पाउनेछ । यदि कुनै उम्मेदवारले सरकार गठन गर्न नसके अन्य नेताले प्रयास गर्न पाउनेछन् । त्यसपछि पनि सरकार बन्न नसके पुनः निर्वाचन हुन सक्नेछ । हालको मन्त्रिपरिषद्ले भने नयाँ सरकार गठन नहुँदासम्म कामचलाउ सरकारका रूपमा निरन्तरता पाउनेछ ।