१३ देवगणको सहभागितामा पाटनमा अष्टमातृका नाच [तस्बिरहरू]

ललितपुर । ललितपुरको ऐतिहासिक पाटन दरबार क्षेत्रस्थित मूलचोकमा सांस्कृतिक तथा तान्त्रिक परम्परासँग जोडिएको ऐतिहासिक गँः प्याखँ अर्थात् अष्टमातृका नाच प्रस्तुत गरिएको छ। नेवारी समुदायको गहिरो धार्मिक तथा तान्त्रिक परम्परासँग सम्बन्धित यस नाचमा विभिन्न देवीदेवताका १३ जना देवगणको विशेष सहभागिता रहेको थियो। पाटनको प्राचीन सांस्कृतिक धरोहरका रूपमा रहेको अष्टमातृका नाचमा सहभागी प्रत्येक देवगणको आ–आफ्नै विशिष्ट तान्त्रिक मुद्रा र भावभङ्गी रहने गर्छ। परम्परागत बाजागाजासहित विधिपूर्वक मूलचोकमा प्रस्तुत गरिएको नाचले पाटनको समृद्ध सांस्कृतिक पहिचानलाई थप उजागर गरेको छ। प्राचीनकालदेखि चल्दै आएको यस नाचले तान्त्रिक साधना, धार्मिक आस्था तथा नेवारी लोकसंस्कृतिको संरक्षणमा महत्वपूर्ण भूमिका खेल्दै आएको छ। पुस्तौँदेखि निरन्तरता पाउँदै आएको यो परम्परा पाटनको मौलिक सांस्कृतिक पहिचानसँग समेत जोडिएको छ। अष्टमातृका नाचको अवलोकन तथा दर्शन गर्न मूलचोकमा स्थानीय कलाप्रेमी, बौद्धिक व्यक्तित्वका साथै स्वदेशी तथा विदेशी पर्यटकको उल्लेखनीय उपस्थिति रहेको थियो। परम्परागत शैली, बाजागाजा र देवगणहरूको विशेष प्रस्तुतिले मूलचोकको वातावरणलाई सांस्कृतिक रंगले भरिएको थियो। यस्ता तान्त्रिक तथा सांस्कृतिक नाचहरूले पुर्खाले हस्तान्तरण गर्दै आएको ऐतिहासिक र सांस्कृतिक विरासतलाई संरक्षण गर्दै नयाँ पुस्तासम्म पुर्‍याउन महत्वपूर्ण योगदान दिँदै आएका छन्। तस्बिरः घनश्याम श्रेष्ठ /रासस