हेटौँडामा गाडीको ठक्करबाट मोटरसाइकल चालकको मृत्यु

काठमाडौं।मकवानपुरको हेटौँडामा पिकअप गाडी र मोटरसाइकल एकआपसमा ठोक्किँदा एक जनाको मृत्यु भएको छ। सोमबार अपराह्न करिब ४:५० बजे हेटौँडा उपमहानगरपालिका-१, सामरीस्थित हेटौँडा-भैँसे सडकखण्डमा उक्त दुर्घटना भएको हो। दुर्घटनामा हेटौँडा उपमहानगरपालिका-१०, बुद्धचोक निवासी ४२ वर्षीय विनोद लामाको मृत्यु भएको जिल्ला प्रहरी कार्यालय मकवानपुरले जनाएको छ। प्रहरीका अनुसार हेटौँडाबाट भैँसेतर्फ जाँदै गरेको खुर्सानी बोकेको पिकअप र विपरीत दिशाबाट आउँदै गरेको मोटरसाइकल आपसमा ठोक्किएका थिए। दुर्घटनामा गम्भीर घाइते भएका लामालाई उपचारका लागि हेटौँडा अस्पताल लगिएको थियो। अस्पतालमा चिकित्सकले साँझ ५:१० बजे उनलाई मृत घोषणा गरेका थिए। जिल्ला प्रहरी कार्यालय मकवानपुरका प्रवक्ता एवं प्रहरी नायब उपरीक्षक माधवप्रसाद काफ्लेका अनुसार दुर्घटनामा संलग्न बा.प्र.०१-०३२ च ०१४१ नम्बरको पिकअप, बा.४७ प ८४६१ नम्बरको मोटरसाइकल र पिकअप चालकलाई प्रहरीले नियन्त्रणमा लिएको छ।