स्पेसएक्सले स्टारलिंकलाई पूर्ण मोबाइल सेवा प्रदायक बनाउन बुस्ट मोबाइल अधिग्रहण गर्ने सम्भावना

स्पेसएक्सले स्टारलिंक मोबाइललाई अमेरिकाको पूर्ण मोबाइल सेवा प्रदायक बनाउने आफ्नो योजना लुकाएको छैन। गत महिना कम्पनीले यो योजना अघि बढाउन थप रेडियो फ्रिक्वेन्सी (स्पेक्ट्रम) पनि खरिद गरेको थियो। तर कम्पनीसँग अझै पनि जमिनमा आधारित मोबाइल नेटवर्क छैन। गत साता टी-मोबाइलका प्रमुख कार्यकारी अधिकृतले आफ्नो कम्पनीको नेटवर्कमा स्टारलिंक मोबाइललाई सेवा सञ्चालन गर्न नदिने स्पष्ट पारेका थिए। अब नयाँ रिपोर्टअनुसार इलन मस्कले यो समस्या समाधान गर्ने उपाय फेला पारेका हुन सक्छन्। त्यसका लागि उनले बुस्ट मोबाइललाई रोजेका छन्। स्पेसएक्सले पछिल्ला केही महिनामा बुस्ट मोबाइलको मूल कम्पनी इकोस्टारसँग सम्भावित सम्झौताबारे छलफल गरेको बताइएको छ। मस्कले अक्टोबरमा इकोस्टारका अध्यक्ष चार्ली एर्गेनसँग व्यक्तिगत रूपमा भेटेका थिए। सम्भावित सम्झौताअनुसार स्पेसएक्सले बुस्ट मोबाइल पूर्ण रूपमा खरिद गर्न वा यसको नेटवर्क प्रयोग गर्ने अनुमति लिन सक्छ। बुस्टले एटीएन्डटी र टी-मोबाइलबाट नेटवर्क भाडामा लिएर सेवा सञ्चालन गर्दै आएको छ। दुवैमध्ये जुनसुकै सम्झौता भए पनि स्पेसएक्सले परम्परागत मोबाइल टावरमार्फत सेवा उपलब्ध गराउन सक्नेछ। यसले हाल स्याटेलाइटको सिग्नल पर्याप्त बलियो नभएका घरभित्र र सहरी क्षेत्रमा पनि मोबाइल सेवा सञ्चालन गर्न मद्दत गर्नेछ। जीएसएमएरिनाका अनुसार रिपोर्टअनुसार मस्कले अमेरिकाका तीन ठूला मोबाइल सेवा प्रदायक भेरिजोन, एटीएन्डटी र टी-मोबाइलका प्रमुखहरूलाई आफ्नो नेटवर्क प्रयोग गर्न दिन आग्रह गरेका थिए। तर तीनै कम्पनीले अस्वीकार गरेका थिए। यसमा टी-मोबाइल मात्र नभई अन्य दुई कम्पनी पनि सहमत भएका थिएनन्। तर यसले मस्कलाई फेरि समस्या पार्न सक्छ। सामान्यतया मोबाइल सेवा प्रदायकले अर्को कम्पनीबाट नेटवर्क भाडामा लिँदा गरिएको सम्झौता नेटवर्क उपलब्ध गराउने कम्पनीको अनुमति बिना नयाँ मालिकलाई हस्तान्तरण गर्न मिल्दैन। त्यसैले बुस्टमार्फत स्पेसएक्सले सेवा सुरु गर्नुअघि एटीएन्डटी र टी-मोबाइल दुवैको स्वीकृति आवश्यक पर्न सक्छ। तर उनीहरूले यस्तो अनुमति दिने सम्भावना कम देखिएको छ। गत अगस्टमा स्पेसएक्सले अमेरिकी दूरसञ्चार बजारमा प्रवेश गर्दै एटीएन्डटी, टी-मोबाइल र भेरिजोनसँग प्रतिस्पर्धा गर्ने योजना सार्वजनिक गरेको थियो। हालैको आम्दानीसम्बन्धी छलफलमा स्पेसएक्सका प्रमुख वित्तीय अधिकृत ब्रेट जोनसनले कम्पनीको लक्ष्य “अमेरिकाको प्रमुख मोबाइल सेवा प्रदायकमध्ये एक बन्ने” रहेको बताएका थिए। कम्पनीले १२ हजारभन्दा बढी स्याटेलाइटलाई आम्दानीको नयाँ र ठूलो स्रोतमा परिणत गर्न पनि विस्तारित मोबाइल नेटवर्कलाई माध्यमका रूपमा हेरेको बताइएको छ। भेराइजनका प्रमुख कार्यकारी अधिकृतले स्पेसएक्सलाई आवश्यक पूर्वाधार निर्माण गर्न चारदेखि छ वर्ष लाग्ने अनुमान गरेका छन्। तर मस्कले भने त्यसको करिब आधा समयमै यो काम पूरा गर्न सकिने बताएका छन्। यद्यपि, मस्कले यसअघि सार्वजनिक गरेका समयसीमाभित्रै योजना पूरा गरेको उदाहरण भने कमै छन्। यस रिपोर्टबारे भेराइजन र इकोस्टारले टिप्पणी गर्न अस्वीकार गरेका छन्। स्पेसएक्स, एटीएन्डटी र टी-मोबाइलले भने कुनै प्रतिक्रिया नदिएका जीएसएमएरिनाले उल्लेख गरेको छ। The post स्पेसएक्सले स्टारलिंकलाई पूर्ण मोबाइल सेवा प्रदायक बनाउन बुस्ट मोबाइल अधिग्रहण गर्ने सम्भावना appeared first on Technology Khabar.