सुमो दुर्घटना अपडेट : मृत्यु हुनेमध्ये एक जनाको पहिचान खुल्यो

खोटाङ । काठमाडौंबाट खोटाङ आउँदै गरेको सुमो दुर्घटनामा परी मृत्यु हुनेमध्ये एक जनाको पहिचान खुलेको छ । को १ ज २९७६ नम्बरको सुमो सिन्धुलीको फिक्कल गाउँपालिका–६, नागथानस्थित मध्यपहाडी लोकमार्गबाट सुनकोसीमा खस्दा दिक्तेल रूपाकोट मझुवागढी नगरपालिका–५, लफ्याङकी २१ वर्षीया युपना राईको मृत्यु भएको हो । अन्यको पहिचान खुलेको छैन । गएराति २ः३० बजे नागथानस्थित मध्यपहाडी लोकमार्गबाट करिब एक सय ५० मिटर तल सुमो खसेको थियो । बेपत्ताको नामठेगानासमेत नखुलेको जिल्ला प्रहरी कार्यालय खोटाङका प्रहरी नायब उपरीक्षक प्रकाश बुढाथोकीले बताए । दुर्घटनामा चालक ओखलढुंगा सिद्धिचरण नगरपालिका–२ का २९ वर्षीय आशिष विश्वकर्मासहित चार जना घाइते भएका छन् । उनीहरूमध्ये ओखलढुंगाका विश्वकर्मा, खोटाङको दिक्तेल रूपाकोट मझुवागढी नगरपालिका–३ की ३८ वर्षीया सम्झना राई, उनकी १२ वर्षीया छोरी शिवानी राई र दिक्तेलका १३ वर्षीय अंकित विश्वकर्मा छन् । उनीहरूमध्ये आशिष बेहोस छन् भने सम्झनाको अवस्था गम्भीर छ । सम्झनालाई हेलिकोप्टरमार्फत काठमाडौं लैजाने तयारी भइरहेको गाडीका जितराज राईले बताए । अन्यको सिन्धुली जिल्ला अस्पतालमा उपचार भइरहेको जिल्ला प्रहरी कार्यालय खोटाङका सूचना अधिकारी निराजन बस्नेतले जनाए । उक्त गाडीमा १० जना सवार रहेको प्रहरीको भनाइ छ । चालक निदाएर दुर्घटना भएको हुन सक्ने प्रहरीको अनुमान छ । उक्त गाडी राति ११ बजे काठमाडौंबाट खोटाङतर्फ हिँडेको प्रहरीले जनाएको छ । अन्य विवरण आउन बाँकी छ ।