साइबर ब्युरोबाट रिहा भएपछि किशोर श्रेष्ठले भने, ‘प्रेस स्वतन्त्रता जिन्दावाद !’

काठमाडौं। साइबर ब्युरोबाट रिहा भएपछि जनआस्था साप्ताहिकका प्रधानसम्पादक किशोर श्रेष्ठले प्रेस स्वतन्त्रताको पक्षमा आवाज उठाउँदै सञ्चार जगतमा एकता प्रदर्शन भएको बताएका छन्। शनिबार सामाजिक सञ्जालमा पोस्ट गर्दै श्रेष्ठले समाचार सम्प्रेषण गरेकै आधारमा पत्रकारलाई पक्राउ गर्न र सञ्चार उपकरण जफत गर्न नपाइने सर्वोच्च अदालतको मान्यता पुनः स्थापित भएको दाबी गरेका छन्। जग्गा हडपेको विषयमा प्रकाशित समाचारलाई लिएर राष्ट्रिय स्वतन्त्र पार्टी (रास्वपा) का नेता तथा कलाकार हिमेश पन्तले दिएको उजुरीका आधारमा श्रेष्ठलाई शनिबार बिहान ललितपुरस्थित निवासबाट साइबर ब्युरोले पक्राउ गरेको थियो। पन्तसँग केही घण्टा छलफल भएपछि उनलाई शनिबार साँझ रिहा गरिएको हो। रिहाइपछि प्रतिक्रिया दिँदै श्रेष्ठले आफ्नो अघिल्लो गिरफ्तारीका क्रममा सर्वोच्च अदालतले समाचार सम्प्रेषण गरेकै आधारमा पत्रकारलाई पक्राउ गर्न तथा सञ्चार उपकरण जफत गर्न नपाइने परमादेश जारी गरेको उल्लेख गरेका छन्। उनले यसपटक पनि सोही मान्यता स्थापित भएको बताएका छन्। सञ्चारमाध्यममा प्रकाशित सामग्रीप्रति चित्त नबुझेमा त्यसबारे उजुरी गर्ने उपयुक्त निकाय प्रेस काउन्सिल भएको उल्लेख गर्दै श्रेष्ठले सञ्चारमाध्यमविरुद्धका विषयको निरूपण गर्ने निकाय साइबर ब्युरो नभएको टिप्पणी गरेका छन्। ‘अब हिमेश भाइ कुनै गुनासो भए प्रेस काउन्सिल जानुहुन्छ,’ श्रेष्ठले सामाजिक सञ्जालमा लेखेका छन्। श्रेष्ठले सामाजिक सञ्जालमार्फत आफूहरूमाथि व्यक्ति लक्षित टिप्पणी भएको तथ्य पन्तले स्वीकार गरेको दाबीसमेत गरेका छन्। आफू बिहान घरबाट पक्राउ परेर साँझ घर फर्किएको उल्लेख गर्दै उनले आफ्नो पोस्टको अन्त्यमा लेखेका छन्, ‘प्रेस स्वतन्त्रता जिन्दावाद !’