सञ्चारमाध्यमका कार्यालयमा पुग्याे प्रहरी, पत्रकारलाई पक्राउ गर्ने प्रयास

काठमाडौं । प्रहरीले सञ्चारमाध्यमका कार्यालयमै प्रवेश गरेर पत्रकारलाई पक्राउ गर्ने तथा खोजी गर्ने क्रम बढाएको छ । नेपाल प्रेसका पत्रकार विश्वमणि सुवेदीलाई कार्यालयबाटै पक्राउ गरेको प्रहरीले अन्य सञ्चारमाध्यमका कार्यालयमा समेत पुगेर पत्रकारको खोजी गरेको छ । आज नेपाल प्रेसको कार्यालयबाट पत्रकार सुवेदीलाई पक्राउ गरेको प्रहरी नयाँ पत्रिका र दियो पोस्ट अनलाइनको कार्यालयमा पनि पुगेको हो । नयाँ पत्रिकाको कार्यालयमा पत्रकार नवराज मैनालीलाई खोज्दै सादा पोसाकमा प्रहरी पुगेको थियो । प्रहरीले पक्राउ पुर्जीबिनै मैनालीलाई नियन्त्रणमा लिन खोजेको त्यहाँ कार्यरत एक पत्रकारले जानकारी दिनुभएको छ । प्रहरी टोली अझै नयाँ पत्रिकाको कार्यालयमै रहेको बताइएको छ । त्यस्तै, दियो पोस्ट अनलाइनको कार्यालयमा पनि प्रहरी पुगेको थियो । दियो पोस्टका सम्पादक सुदीप विश्वकर्मालाई खोज्दै गएको प्रहरी उहाँलाई नभेटेपछि फर्किएको त्यहाँ कार्यरत पत्रकारले बताएका छन् । यसैबीच, नेपाल प्रेसको प्रकाशन संस्था नेपाल ई–प्रेसका अध्यक्ष विन्दुराज लम्साल र प्रधानसम्पादक मातृका पौडेललाई पनि साइबर ब्यूरोमा उपस्थित हुन भनिएको छ । प्रहरीले फोन गरेर बोलाएपछि उहाँहरू ब्यूरो पुग्नुभएको हो । नेपाल प्रेसको कार्यालयमै प्रवेश गरेर पत्रकार सुवेदीलाई पक्राउ गरेलगत्तै प्रहरीले अध्यक्ष लम्साल र प्रधानसम्पादक पौडेललाई समेत ब्यूरोमा बोलाएको हो । सञ्चारमाध्यमका कार्यालयमै प्रवेश गरेर पत्रकारलाई पक्राउ गर्ने र खोजी गर्ने प्रहरीको पछिल्लो गतिविधिले प्रेस स्वतन्त्रता र पत्रकारको सुरक्षासम्बन्धी प्रश्न उठाएको छ ।