विश्वभर इन्टरनेट प्रयोगकर्ताको संख्या ६.३ अर्ब पुग्यो, एक चौथाइ जनसंख्या अझै इन्टरनेटको पहुँचभन्दा बाहिर

अन्तर्राष्ट्रिय दूरसञ्चार संघ (आईटीयू) को पछिल्लो ‘तथ्य तथा आँकडा’ प्रतिवेदन अनुसार, सन् २०२६ मा विश्वका करिब ६.३ अर्ब मानिसहरूले इन्टरनेट प्रयोग गरिरहेका छन्। यो संख्या विश्व जनसंख्याको ७६ प्रतिशत हुन आउँछ। यो संख्या सन् २०२५ को परिमार्जित आँकडा ६.१ अर्ब (७४ प्रतिशत) को तुलनामा बढी हो। यद्यपि प्रयोगकर्ताको संख्यामा वृद्धि भएको छ, तर करिब २ अर्ब मानिसहरू अझै पनि इन्टरनेटको पहुँचभन्दा बाहिर (अफलाइन) छन्। यसको अर्थ, विश्वको एक चौथाइ जनसंख्या अझै पनि डिजिटल सेवाहरूबाट वञ्चित रहेको संयुक्त राष्ट्रसंघीय निकायले जनाएको छ। विस्तारका बाबजुद, आय समूहहरूका बीचमा इन्टरनेट पहुँचमा ठूलो असमानता कायमै छ; उच्च आय भएका देशहरूमा ९३ प्रतिशत मानिसहरू इन्टरनेटमा जोडिएका छन् भने कम आय भएका देशहरूमा यो दर जम्मा ३२ प्रतिशत मात्र छ। प्रतिवेदनमा आईटीयूकी महासचिव डोरिन बोगडान-मार्टिनले भनिन्, “एआईको युगमा, अफलाइन हुनुको अर्थ शिक्षादेखि रोजगारीसम्मका अनगिन्ती अवसरहरूबाट वञ्चित हुनु हो।” उनले थपिन्, “अहिले हामीलाई पहिलेभन्दा बढी कनेक्टिभिटी विस्तार गर्न र यसलाई सबैका लागि, जताततै अर्थपूर्ण बनाउन आवश्यक छ।” प्रतिवेदनका अनुसार लैङ्गिक र भौगोलिक आधारमा पनि भिन्नताहरू देखिएका छन्; पुरुषहरूमा इन्टरनेट प्रयोग दर ७९ प्रतिशत छ भने महिलाहरूमा यो दर ७४ प्रतिशत रहेको छ। त्यस्तै, सहरी क्षेत्रका ८२ प्रतिशत मानिसहरू इन्टरनेट प्रयोग गर्छन्, जबकि ग्रामीण क्षेत्रमा यो दर ६३ प्रतिशत छ। प्रतिवेदनका अनुसार, विश्वका लगभग सम्पूर्ण जनसङ्ख्याको पहुँचमा आधारभूत मोबाइल नेटवर्कहरू भए तापनि, नयाँ प्रविधिहरूको वितरण भने असमान छ। प्रतिवेदनले विश्वभर ५९ प्रतिशत मानिसहरू ५जी नेटवर्कको पहुँचमा रहेको देखाएको छ। यसमा उच्च आय भएका देशहरूमा ८६ प्रतिशत कभरेज छ भने कम आय भएका देशहरूमा यो जम्मा ४ प्रतिशत मात्र रहेको छ। प्रतिवेदनअनुसार, आर्थिक पहुँच पनि एउटा बाधकका रूपमा रहेको छ। ३० प्रतिशत देशहरूले फिक्स्ड वा मोबाइल ब्रोडब्यान्डको किफायतीपनसम्बन्धी मापदण्ड पूरा गर्न सकेका छैनन्। ‘फ्याक्ट्स एन्ड फिगरस् २०२६’ (Facts and Figures 2026) का मुख्य निष्कर्षहरू अनुसार, विश्वव्यापी रूपमा ७९ प्रतिशत पुरुष र ७४ प्रतिशत महिलाले इन्टरनेट प्रयोग गर्छन्। इन्टरनेट प्रयोग गर्ने महिला र पुरुषको अनुपात ०.९४ पुगेको छ। अन्य जनसंख्याको तुलनामा युवाहरू बढी जोडिएका छन् र विश्वभर १५ देखि २४ वर्ष उमेर समूहका ८६ प्रतिशत मानिसहरू इन्टरनेट प्रयोग गर्छन्, जबकि बाँकी जनसंख्यामा यो दर ७४ प्रतिशत छ। अन्तर्राष्ट्रिय दूरसञ्चार संघका अनुसार, सहरी र ग्रामीण क्षेत्रबीचको खाडल साँघुरिएको भए तापनि स्पष्ट असमानताहरू अझै कायम छन्। विश्वव्यापी रूपमा, सहरी क्षेत्रका ८२ प्रतिशत बासिन्दाको इन्टरनेटमा पहुँच छ, जबकि ग्रामीण क्षेत्रमा यो दर ६३ प्रतिशत छ। मोबाइल फोन स्वामित्वको सन्दर्भमा, प्रतिवेदनले जनाए अनुसार विश्वभर १० वर्ष वा सोभन्दा माथिका ८४ प्रतिशत मानिसहरूसँग मोबाइल फोन छ। उच्च आय भएका देशहरूमा यो स्वामित्व ९५ प्रतिशतभन्दा बढी छ भने कम आय भएका देशहरूमा ५७ प्रतिशत छ। यसबाहेक, विश्वको करिब ९७ प्रतिशत जनसंख्या कम्तीमा थ्रीजी नेटवर्कको पहुँचभित्र बसोबास गर्छन्। यसले के खुलासा गर्‍यो भने, उच्च आय भएका देशहरूमा प्रति सदस्यता औसत मासिक मोबाइल ब्रोडब्यान्ड ट्राफिक २० जीबी छ, जुन कम आय भएका देशहरूको ३.४ जीबीको तुलनामा करिब छ गुणा बढी हो। The post विश्वभर इन्टरनेट प्रयोगकर्ताको संख्या ६.३ अर्ब पुग्यो, एक चौथाइ जनसंख्या अझै इन्टरनेटको पहुँचभन्दा बाहिर appeared first on Technology Khabar.