रजनीकान्तको ‘जेलर २’ले रच्यो इतिहास, बन्यो सर्वाधिक कमाउने तमिल फिल्म

काठमाडौं । सुपरस्टार रजनीकान्त अभिनीत चलचित्र ‘जेलर २’ले बक्स अफिसमा ऐतिहासिक सफलता हासिल गरेको छ। चलचित्रले विश्वव्यापी रूपमा ७१० करोड भारतीय रुपैयाँभन्दा बढी कमाइ गर्दै रजनीकान्त र अक्षय कुमार अभिनीत ‘२.०’को कीर्तिमान तोडेको छ। यससँगै ‘जेलर २’ अहिलेसम्मकै सर्वाधिक कमाइ गर्ने तमिल चलचित्र बनेको छ। आइतबारसम्म चलचित्रको विश्वव्यापी ग्रस कमाइ ७१०.३५ करोड भारतीय रुपैयाँ पुगेको ट्रेड ट्र्याकर साकनिल्कले जनाएको छ। भारतमा मात्रै चलचित्रले आइतबार २५.७० करोड रुपैयाँ कमाएको थियो। यससँगै यसको घरेलु ग्रस सङ्कलन ४६६.८५ करोड रुपैयाँ पुगेको छ भने नेट कमाइ ३९८.७० करोड रुपैयाँ पुगेको छ। यसअघि रजनीकान्त र अक्षय कुमार अभिनीत चलचित्र ‘२.०’ले ६९१ करोड भारतीय रुपैयाँ कमाउँदै कीर्तिमान बनाएको थियो। ‘जेलर २’ले उक्त आँकडा पार गरेपछि तमिल चलचित्र उद्योगमा नयाँ रेकर्ड कायम गरेको हो। चलचित्रले प्रदर्शनको सुरुवाती दिनमै बक्स अफिसमा प्रभावशाली प्रदर्शन गरेको थियो। यसले विश्वभर तीन दिनमै ३०० करोड र चौथो दिनमा ४०० करोड भारतीय रुपैयाँको व्यापार गरेको थियो। ती उपलब्धिसँगै चलचित्रले तीव्र गतिमा कमाइको नयाँ रेकर्डसमेत बनाएको छ। चलचित्रको सफलताप्रति निर्देशक नेल्सन दिलीपकुमारले खुसी व्यक्त गरेका छन्। उनले सामाजिक सञ्जाल एक्समार्फत हलहरूमा दर्शकको उत्साह अभूतपूर्व रहेको उल्लेख गर्दै माया र समर्थनका लागि दर्शकलाई धन्यवाद दिएका छन्। सन पिक्चर्सको निर्माणमा बनेको ‘जेलर २’ अक्टोबर १५ देखि सिनेमा घरमा प्रदर्शनमा आएको हो। चलचित्रमा रजनीकान्तसँगै रम्या कृष्णन, मोहनलाल, शिव राजकुमार, ज्याकी श्राफ, योगी बाबू, एसजे सूर्या, विद्या बालान, मिथुन चक्रवर्तीलगायत कलाकारको अभिनय रहेको छ।