मुस्ताङमा बढ्यो पर्यटकीय चहलपहल

काठमाडौं। दसैँपछि हिमाली जिल्ला मुस्ताङमा पर्यटकीय चहलपहल बढेको छ। असोज ११ गतेको बाढी पहिरोका कारण बेनी-जोमसोम सडकमार्ग अवरुद्ध हुँदा केही समय सुनसान बनेको मुस्ताङमा अहिले पर्यटकको आगमन सङ्ख्यामा वृद्धि भएको छ। जिल्ला प्रहरी कार्यालय मुस्ताङका प्रहरी निरीक्षक एवं सूचना अधिकारी ईश्वर महतका अनुसार दसैँपछि सडकमार्ग सञ्चालनमा आएसँगै पर्यटकको चहलपहल बढेको हो। प्रहरीको तथ्याङ्क अनुसार घटस्थापनादेखि विजया दशमीसम्मको १० दिनको अवधिमा पाँच हजार ६६३ जना पर्यटक मुस्ताङ भित्रिएका थिए। जसमा तीन हजार ७३८ पुरुष र एक हजार ९२५ महिला छन्। सो अवधिमा भित्रिएका पर्यटकमध्ये चार हजार ४०९ अर्थात् ७७ दशमलव ८५ प्रतिशत विदेशी पर्यटक रहेका थिए। दसैँको टीकापछिको दुई दिनमा मात्रै सात हजार ८४६ जना पर्यटक मुस्ताङ पुगेका छन्। प्रहरीका अनुसार बिहीबार तीन हजार ३३ र शुक्रबार चार हजार ८१३ जना स्वदेशी तथा विदेशी पर्यटक मुस्ताङ भित्रिएका हुन्। यसअघि साउनमा ३० हजार ५३४, भदौमा २० हजार २६८ र असोजमा १८ हजार ६०१ जना पर्यटकले मुस्ताङ भ्रमण गरेका थिए। पर्यटन व्यवसायीहरूले दसैँ, तिहार र छठ पर्वको बिदाका कारण आगामी दिनमा पर्यटकको सङ्ख्या अझ बढ्ने अपेक्षा गरेका छन्। मुस्ताङमा मुक्तिनाथ मन्दिर, कोरलानाका, लोमान्थाङ दरबार, ढुम्बा ताल र टिटी ताललगायतका स्थानहरू पर्यटकको मुख्य आकर्षणका केन्द्र हुन्। बाढीका कारण प्रभावित बनेको मुस्ताङको पर्यटन क्षेत्र दसैँपछिको चहलपहलले चलायमान हुने विश्वास लिइएको छ।