बांगलादेशका मोहम्मद सैफउद्दिनले पोखराबाट एनपिएल खेल्ने

काठमाडौं।बांगलादेशका क्रिकेटर मोहम्मद सैफउद्दिनले नेपाल प्रिमियर लिग (एनपिएल) को तेस्रो संस्करण पोखरा एभेन्जर्सबाट खेल्ने भएका छन्। उनलाई टोलीमा भित्र्याएकोबारे पोखराले आज सामाजिक सञ्जालमार्फत जानकारी दिएको हो। “एनपिएलको तेस्रो संस्करणका लागि बांगलादेशका अन्तर्राष्ट्रिय अलराउन्डर मोहम्मद सैफउद्दिनलाई आधिकारिक रूपमा अनुबन्ध गरेको घोषणा गर्न पाउँदा खुसी लागेको छ”, पोखराले भनेको छ। सैफउद्दिन बलिङ र तल्लो क्रममा ब्याटिङ गर्न सक्ने अलराउन्डर हुन्। उनले सन् २०१७ मा बांगलादेशको राष्ट्रिय टोलीबाट एकदिवसीय र टी–२० अन्तर्राष्ट्रिय क्रिकेटमा पदार्पण गरेका थिए। सैफउद्दिनले बांगलादेशका लागि ३० एकदिवसीय अन्तर्राष्ट्रिय खेलमा ३६२ रन बनाउनुका साथै ४२ विकेट लिएका छन्। त्यस्तै, उनले ५१ टी–२० अन्तर्राष्ट्रिय खेल खेलेका छन्। सन् २०१६ को आइसिसी यु–१९ विश्वकपमा बांगलादेशका लागि प्रभावशाली प्रदर्शन गरेका सैफउद्दिनले प्रतियोगितामा १३ विकेट लिएका थिए। उनले सन् २०१९ को एकदिवसीय विश्वकपमा पनि बांगलादेशको प्रतिनिधित्व गरेका थिए। सैफउद्दिनले विभिन्न पाँच वटा टोलीबाट बांगलादेश प्रिमियर लिग (बिपिएल) खेलिसकेका छन्। एनपिएल उनका लागि पहिलो विदेशी लिग हो। पोखराले सैफउद्दिनसहित बांगलादेशकै शाकिबअल हसन र मेहदी हसनलाई पनि अनुबन्ध गरिसकेको छ। एनपिएलको तेस्रो संस्करण यही कात्तिक ९ गतेदेखि काठमाडौंमा आयोजना हुँदैछ।