प्रेम विवाहको ११ महिनामै युवती मृत भेटिइन्, श्रीमान् र सासु पक्राउ

धनगढी । कैलालीको धनगढीमा प्रेम विवाह गरेको ११ महिनामै एक युवती मृत भेटिएको घटनामा प्रहरीले उनका श्रीमान् र सासुलाई पक्राउ गरेको छ। धनगढी उपमहानगरपालिका–६ मट्यारीमा शुक्रबार मृत भेटिएकी कविता जोशीको मृत्यु प्रकरणमा उनका श्रीमान् सरोज पाठक र सासु कमलादेवी पाठक पक्राउ परेका हुन्। मृतकका माइती पक्षले दिएको किटानी जाहेरीका आधारमा दुवै जनालाई आत्महत्या दुरुत्साहनको आरोपमा पक्राउ गरिएको जिल्ला प्रहरी कार्यालय कैलालीले जनाएको छ। प्रहरीका अनुसार पक्राउ परेका दुवै जनामाथि अदालतबाट म्याद थप गरी घटनाबारे थप अनुसन्धान भइरहेको छ। माइती पक्षले कविताको मृत्युमा जिम्मेवार व्यक्तिमाथि निष्पक्ष अनुसन्धान गरी कडा कानुनी कारबाही गर्न माग गरेको छ। स्रोतका अनुसार बझाङको बुंगल नगरपालिका–४ तमतोली माइती घर भएकी कविताले धनगढीका सरोज पाठकसँग गत वर्ष मंसिरमा प्रेम विवाह गरेकी थिइन्। सरोज कृषि विकास बैंकमा कार्यरत रहेका बेला उनीहरूबीच प्रेम सम्बन्ध सुरु भएको थियो। प्रेम सम्बन्धलाई विवाहमा परिणत गरेका उनीहरूको वैवाहिक जीवन वर्ष दिन पनि टिक्न सकेन। अहिले कविताको मृत्युको कारण र घटनामा कसको भूमिका थियो भन्ने विषयमा प्रहरीले अनुसन्धान अघि बढाएको छ।