नोबेल विजेता नेत्री माचादो निर्वासनपछि भेनेजुएला फर्किइन्

काठमाडौं । भेनेजुएलाकी प्रमुख विपक्षी नेत्री तथा नोबेल शान्ति पुरस्कार विजेता मारिया कोरिना माचादो १० महिनाभन्दा लामो निर्वासनपछि स्वदेश फर्किएकी छन् । “म यहाँ छु, तपाईंहरूसँगै,” माचादोले आइतबार बिहान सामाजिक सञ्जाल एक्समार्फत आफ्नो स्वदेश फिर्ती घोषणा गरेकी हुन् । विपक्षी नेताहरूले पनि उनको फिर्ती पुष्टि गरेका छन् । निर्वासनमा रहेका पूर्वराष्ट्रपति उमेदवार एडमुन्डो गोन्जालेज उरुटियाले उनको फिर्तीलाई स्वागत गर्दै यसलाई भेनेजुएलाको सार्वभौम आवाज र राजनीतिक प्रक्रियाका लागि महत्त्वपूर्ण दिन बताएका छन् । उनले आफू पनि छिट्टै स्वदेश फर्किने बताएका छन् । विपक्षी दलहरूले लारा राज्यस्थित सान्टा रोसा चर्चमा समर्थकहरूले माचादोलाई स्वागत गरिरहेको तस्बिर सार्वजनिक गरेका छन् । अमेरिकी राष्ट्रपति डोनाल्ड ट्रम्पले माचादोको स्वदेश फिर्तीबारे आफूलाई जानकारी नभएको बताएका छन् । माचादो गत डिसेम्बरमा नोबेल शान्ति पुरस्कार ग्रहण गर्न नर्वे गएकी थिइन् । त्यसपछि उनी निर्वासनमा थिइन् । माचादोले देश छाडेको एक महिनापछि अमेरिकाले भेनेजुएलाका राष्ट्रपति निकोलस मादुरोलाई सत्ताच्युत गरेको थियो । त्यसयता अमेरिकाले भेनेजुएलाको कार्यवाहक सरकारसँग मिलेर लोकतान्त्रिक संक्रमण र राजनीतिक मेलमिलापको प्रक्रिया अघि बढाइरहेको छ । यस प्रक्रियामा विपक्षीका केही वरिष्ठ नेता सहभागी भए पनि माचादो र गोन्जालेज उरुटियालाई समावेश गरिएको थिएन । विपक्षी गठबन्धनसँगको वार्ताको नेतृत्व गरिरहेकी दिनोरा फिगुएराले माचादोको स्वदेश फिर्तीलाई मादुरो सत्ताच्युत भएपछि अघि बढेको राजनीतिक मेलमिलाप प्रक्रियाको परिणामका रूपमा व्याख्या गरेकी छन् । सीएनएन