नेपाली क्रिकेट टोली स्वदेश फर्कियो

काठमाडौँ।आईसीसी विश्वकप लिग–२ अन्तर्गतको शृङ्खला खेलेर नेपाली राष्ट्रिय पुरुष क्रिकेट टोली स्वदेश फर्किएको छ। ओमानमा सम्पन्न एकदिवसीय अन्तर्राष्ट्रिय शृङ्खलामा सहभागी भएर नेपाली टोली आज बेलुका त्रिभुवन अन्तर्राष्ट्रिय विमानस्थलमा आइपुगेको हो । टोलीलाई विमानस्थलमा नेपाल क्रिकेट संघ (क्यान) का प्रतिनिधिहरूले स्वागत गरेका थिए । लिग–२ को अन्तिम शृङ्खलामा नेपालले उत्कृष्ट प्रदर्शन गर्दै चारमध्ये तीन खेलमा जित निकालेको थियो । उक्त शृङ्खलामा नेपालले ओमान र क्यानडासँग प्रतिस्पर्धा गरेको थियो । नेपालले शृङ्खलामा तीन खेल जिते पनि विश्वकप लिग–२ मा आफ्नो एकदिवसीय अन्तर्राष्ट्रिय मान्यता जोगाउने सम्भावना भने अझै अनिश्चित छ ।