नेपाल-मलेसिया संयुक्त कार्यदलको बैठक काठमाडौँमा राख्न कूटनीतिक पहल

काठमाडौँ।नेपाल र मलेसियाबीच श्रमिक छनौट तथा भर्ना प्रक्रियामा देखिएका विषयहरूमा छलफल गर्न सरकारले कूटनीतिक पहल अघि बढाएको छ। श्रम, रोजगार तथा सामाजिक सुरक्षा मन्त्रालयले परराष्ट्र मन्त्रालयमार्फत मलेसियाली पक्षलाई औपचारिक पत्राचार गर्दै संयुक्त कार्यदल (Joint Working Group-JWG) को बैठक काठमाडौँमा आयोजना गर्न प्रस्ताव गरेको हो। नेपालले उक्त बैठकका लागि सन् २०२६ को नोभेम्बर १८-१९ वा डिसेम्बर २-३ को मिति प्रस्ताव गरेको छ। मलेसियाको अनुकूलताअनुसार अन्तिम मिति तय गर्न सकिने नेपालको भनाइ छ। बैठकमा वैदेशिक रोजगारीको क्षेत्रमा देखिएका विविध सवालहरूमा सहमति जुटाउने लक्ष्य राखिएको छ। नेपालले विशेष गरी FWCMS प्रणालीअन्तर्गत नेपाली श्रमिकको भर्ना प्रक्रियालाई थप व्यवस्थित, पारदर्शी र श्रमिकमैत्री बनाउने विषयमा छलफल गर्ने योजना बनाएको छ। साथै, सन् २०१८ मा दुई देशबीच भएको श्रम समझदारीपत्रको नवीकरणसम्बन्धी मस्यौदालाई अन्तिम रूप दिने अपेक्षा पनि गरिएको छ। नयाँ व्यवस्था नभएसम्म विद्यमान प्रणालीलाई नै निरन्तरता दिनुपर्ने नेपालको अडान छ। यसले श्रमिक भर्ना प्रक्रियामा सहजता र पूर्वानुमानयोग्यता कायम राख्न मद्दत पुग्ने सरकारको विश्वास छ। मलेसियासँगको दीर्घकालीन श्रम सहकार्यलाई उच्च प्राथमिकता दिँदै नेपाली श्रमिकको हित संरक्षण र सुरक्षित वैदेशिक रोजगारी प्रवर्द्धन गर्ने उद्देश्यले यो पहल गरिएको हो।