दोस्रो खेलदेखि डेविड वार्नर आउन सक्छन् : काठमाडौंका प्रशिक्षक शरद

काठमाडौं । जनकपुर बोल्ट्ससँग पराजित भएपछि काठमाडौं गोर्खाजका प्रशिक्षक शरद भेषावकरले दोस्रो खेलदेखि अस्ट्रेलियाका स्टार खेलाडी डेविड वार्नर टोलीमा उपलब्ध हुन सक्ने बताउनुभएको छ । पराजयपछि आयोजित पत्रकार सम्मेलनमा प्रशिक्षक भेषावकरले वार्नर दोस्रो खेलमा वा त्यसपछि टोलीमा जोडिन सक्ने सम्भावना रहेको जानकारी दिनुभयो । उहाँका अनुसार काठमाडौंले ब्याटिङमा राम्रो साझेदारी बनाउन सकेन । लगातार विकेट गुमाउँदा समस्या भएको र टोलीले अपेक्षाअनुसार १० देखि १५ रन कम बनाएको उहाँले बताउनुभयो । खेलका लागि परिस्थिति पनि सहज नरहेको उहाँको भनाइ थियो । जनकपुरको ब्याटिङ लाइनअपमा बायाँहाते ब्याटरको बाहुल्य रहेकाले सोहीअनुसार बलर प्रयोग गरिएको उहाँले स्पष्ट पार्नुभयो । खेलाडी छनोटका विकल्प सीमित रहेको उल्लेख गर्दै विदेशी खेलाडी टोलीमा आएपछि आगामी खेलमा प्रदर्शन सुधार हुने विश्वास पनि उहाँले व्यक्त गर्नुभयो । प्रशिक्षक भेषावकरले जनकपुरका अनुभवी खेलाडी मोइन अली र हसन अलीबीचको साझेदारीलाई खेलको निर्णायक मोडका रूपमा व्याख्या गर्नुभयो । लक्ष्य सामान्य भए पनि आफ्ना खेलाडीले बलिङमा राम्रो प्रयास गरेको उहाँले बताउनुभयो । मुख्य प्रशिक्षकको जिम्मेवारी सहज नरहेको स्वीकार गर्दै उहाँले चुनौतीपूर्ण परिस्थितिमा राम्रो गर्ने आफ्नो स्वभाव रहेको उल्लेख गर्नुभयो । जनकपुरका युवा बलर राहुल यादवको प्रदर्शनको प्रशंसा गर्दै भेषावकरले उहाँमा नेपाली क्रिकेटका लागि राम्रो सम्भावना रहेको बताउनुभयो ।